Lahi nga klase sa panamilit

Ikaunom nga Domingo sa Pagkabanhaw
Buhat 15:1-2, 22-29/ Ps. 67/ Gipadayag 21:10-14, 22-23/ Juan 14:23-29

Hangtod sa sunod higayon. Puhon na pud. Magkita-kita unya ta. Babay. Maayong biyahe.

Mao kini ang mga pulong nga sagad natong ilitok kung kita manamilit na. Manamilit kita human sa usa aka tigom sa usa ka party sama sa birthday. Manamilit kita human kita mobisita sa atong mga minahal. Manamilit kita matag-adlaw sa atong balay kung moadto na kita sa trabaho o manamilit na sa trabahoan kung mouli na sa atong balay.

Si Kristo usab karon diha sa Ebanghelyo nanamilit sa iyang mga tinun-an. Iyang gipasabot nga sa dili madugay siya mopanaw na gikan niining kalibutanan ngadto sa balay sa atong Amahan. Siya nagpahimangno nga mobiya na siya. Kita ang iyang mga tinun-an. Apan sa iyang pagbiya kita iyang gilig-on nga ang Espiritu Santo magpabilin uban kanato. Ang kalinaw maghari kanato. Dili kita mahadlok. Ang paghigugma alang kaniya maoy sukdanan sa tinuod nga pagkatinun-an niya. Ang nahigugma kaniya malipay nga mosaksi ug mobarug alang kaniya.

Mao nga diha sa unang pagbasa, ang katilingban nga gihulga sa pagkabahin-bahin tungod sa dili pagkasinabot sa mga isyu sa pagtoo, gipadad-an ug mga instrumento nga maoy maghatag kanila sa pagpasabot sa angay nga himoon. Naningkamut ang mga unang apostoles ug mga tinun-an nga ang katilingban mamahimong instrumento sa pagkahimong usa ka siyudad nga puno sa kahayag sama sa gisulti sa ikaduhang pagbasa. Dinha niining siyudara, ang himaya sa Dios maghari.

Diha sa atong tagsa-tagsa ka pamilya ug dinhi sa atong katilingban, maghari usab unta ang kalinaw ug pagsinabtanay nga dala sa lahi ug makanunayong presensiya sa Ginoo. Ang gasa sa Espiritu Santo makapahiusa unta kanato taliwala sa atong mga paningkamut sa pagpuyo nga hapsay. Bisan kinsa man unya ang mapili nga kandidato sa umaabot nga piniliay, ang matag-usa unta maningkamut sa kahiusahan ug pagtinabangay.

Karon pa lamang, ato na untang puy-an ang kinabuhi sa katilingban sa iyang mga pinili diin ang gugmang Diosnon sa tagsa-tagsa naghari. Puslan man nga ang kinbuhi usa man ka panaw, bansayon na nato ang pagkinabuhi hangtod sa sunod higayon aron puhon na pud nga magkita-kita kita pagusab ang atong babay maghatod kanato sa maayong biyahe niining kalibutana.