GKK SOCCOM sa SILP Nakahuman sa Communications Seminar Workshop

Kapin sa 30 ka mga sekretarya nga karon gitawag na nga Social Communications Committee Head sa mga Gagmay’ng Kristohanong Katilingban ubos sa parokya sa San Isidro Labrador, nakahuman sa usa ka adlaw nga seminar workshop alang sa komunikasyon ug minutes taking nga gihatag sa Archdiocesan Commission on Social Communications (ACSC).

Dako ang kalipay sa mga GKK SoCCom sa mga nadawat nga mga impormasyon ug pagpasabot kalabot sa ilang mahinungdanon nga papel diha sa ilang tagsa-tagsa ka katilingban isip mga tig-tipig sa mga dokumento (records keeper), tighimo sa mga dokumento (documenter), ug labaw sa tanan, tigpakatag sa impormasyon.

Ang maong mga buluhaton gilatid sa bag-ong giya sa GKK kon ang GKK Norms and Guidelines alang sa tibuok Arkidayosis sa Dabaw.

Sa unang hugna sa seminar nga gihimo niadtong petsa 2 sa Abril, gipamahayag ni Fr. Ritsche Gamaya, director sa ACSC, nga gikinahanglan nga makat-onan sa matag usa ka GKK SoCCom ang teoriya sa komunikasyon aron nga mamahimong epektibo nga tigpakatag sa Maayong Balita.

Personal nga nasinati sa matag usa sa mga partisipante ang kabililhon sa pagpamati isip maoy unang ang-ang sa pagsabot sa mensahe nga madawat diha sa message relay nga actibidad sa workshop nga gipanguluhan sa resource speaker nga si Annie Libres, ang News Desk sa Davao Catholic Herald ug program ug producton in-charge sa DXGN 89.9 Spirit FM.

Ang ikaduhang hugna sa seminar workshop mao ang pagtudlo sa mga GKK SoCCom mahitungod sa ensaktong porma ug pag-sulat sa minutas sa usa ka panagtigom kon minutes taking.

Giplanuhan pa usab karon nga himoon ang susamang seminar workshop alang sa uban pang mga servant leaders sa parokya.