Dungga ang tingog sa maayong magbalantay

Ikaupat nga Domingo sa Pagkabanhaw
Buhat 13:14,43-52/ Pagpadayag 7:9,14b-17/ Jn. 10:27-30

Daghang mga tingog ang atong madungog sa atong palibot karon: tingog sa ringtone sa atong cellphone, tingog sa radio o TV, tingog sa busina sa sakyanan o kahayopan, ug tingog sa mga kandidato nga nangampanya.

Dunay mga tingog nga makakuha sa atong atensyon, duna puy tingog nga baliwala lamang kanato. Dunay mga tingog nga sakit paminawon, duna puy tingog nga nindot paminawon.

Nakasabot kita nga si Kristo, ang maayong magbalantay, nag-awhag kanato nga dunggon nato ang iyang tingog tungod kay kita man ang iyang mga karnero. Alang sa mga nihamtong na sa pagtuo, ang tingog sa maayong magbalantay nga atong madungog diha sa iyang mga pulong sa Bibliya ug sa pagsaulog sa mga sakramento, hayahay ug nindot paminawon. Alang sa mga nangandoy sa kabag-ohan ug nagbasul sa ilang mga sala, ang gitudlo ni Kristo angay paminawon.

Apan alang sa mga wala pa nakasabot sa hustong kahulugan sa kinabuhi, ang mga pahimangno ni Kristo diha sa gitudlo sa simbahan ug mga katekismo, walay kahulugan. Alang sa gustong magpdayon sa kangitngit sa sala, ang gitudlo ni Kristo diha sa mga tambag sa kaparian ug sa pahimangno sa atong mga ginikanan, walay kalambigitan sa matag adlaw nga kinabuhi.

Tugutan ba nato nga tingog ni Kristo, ang maayong magbalantay magpakahilum lamang tungod sa atong kahadlok o kahakog o paniguro sa sarili lamang? Magpakahilum ba lamang kita sa pagsangyaw nga buhi ang Dios uban kanato ug tugutan ang tikas, pagpanlupig, panghadlok ug pamaligya ug pamalit ug boto sa umaabot nga piniliay?

Hugasan unta nato ang atong mga hugaw nga tuyo ug paningkamutan nga malimpyo sa natad nga espirituhanon, ekonomikanhon, politikanhon ug kulturanhon. Himuon unta nato ang atong mga kaliwat nga mobarug atubangan sa Ginoo ug mahimo unta kitang instrumento sa paglawig sa kahapsay ug kahingpitan pinaagi sa pagdungog sa iyang tingog.