Divine Mercy Shrine/Parish administrator mapasalamaton

Mapasalamaton ang Shrine–Parish administrator sa simbahan sa Divine Mercy sa siyudad sa Mati sa dakong kooperasyon sa katawhan aron magmalampuson ang mga kalihokan sa 10th Annual Parochial fiesta niadtong Abril 3, 2016. Sa pagtapos sa Fiesta Mass sa miaging domingo, gipasalamatan ni Fr. Bernard M. Albao ang mga komitiba, GKK, PPC officials, ug managlahing mga apostolado tungod sa ilang maayong paghupot og responsabilidad sa ispisyal nga kasaulogan. Gani, gipang-apod-apod niadtong adlawa ang mga Certificates of Appreciation alang sa mga pundok sa PPC ug GKK, mga aktibong apostolado ug movements, ug ingon man para sa tulo nga kanhi kura paroko—sila si Frs. Carlos Baquial, Bienvenido Bersosa ug Samuel Broñola.

Gisaulog ang 9:00 AM Fiesta Mass sa pagpanguna ni Bishop Emeritus Patricio H. Alo, D.D., inubanan nila Fr. Albao ug Apostolic Administrator Msgr. Edito S. Baño, kinsa nagdasig sa katawhan sa iyang wali sa pagka-maluloy-on ug matinabangon sugod sa kaugalingong pamilya, pinasubay usab sa tema nga “Be Merciful as your Father is merciful.”

Sa bisperas sa fiesta, sa Sabado, Abril 2, gipahigayon ang Medical-Dental-Optical mission kon diin ang kabatan-onan nga nagbantay ang nagtala nga kapin 300 ka mga pasyente ang natambalan, kadaghanan niini (150) ang nahatagan og mga bag-ong antipara, ug 100 ang nakapahimulos sa serbisyo sa ngipon. Dakong garbo ug kalingawan usab ang nasinati gikan sa kaparian sa Tagum nga nagpasundayag og Benefit Concert sa banda sa “Pusong Juan”—pinangunahan nila Fr. Alex Adaya, Fr. Ariel Garcia, Fr. Reny Ricardo, ug Fr. Dandy Sercado. Kini para sa katukoran og bag-ong Parish Hall. Sa labing unang higayon sab, aduna nay natukod nga unom ka kiosk alang ug pinaagi sa 6 ka sona nga naglangkob og 24 nga mga GKK. Didto nagtapok ang nagkadaiyang mga GKK alang sa pani-udto samtang ang mga bisita ug bagang katawhan gi-andaman og pagkaon sa parish grounds ug sa kumbento sa pari.