Ayuda Gi-apod sa Nasunugan sa Bankerohan

Abtik nga milihok ang Simbahang Katoliko sap ag-apod-apod ug ayuda alang sa kapin usa ka gatos ka mga pamilya nga biktima sa sunog sa Barangay 9-A Bankerohan niadtong adlaw’ng Biyernes, Abril 15, 2016.

Unang mihatag ug mga pagkaon (food packs) ang parokya sa St. Jude ubos kang Fr. Pete Lamata ngadto sa sobra 400 ka mga indibiduwal.

Dugang mga pagkaon ang gitunol usab sa Archdiocesan Social Action Center (ASAC) lakip sa 30 ka sako nga used clothing ug laing 13 ka sakong bugas pagka-Sabado pinaagi sa Caritas.

Namahayag si Sr. Marissa Arado, staff sa ASAC, nga sa dihang mibisita siya sa dapit sa nasunogan, dakong kahingangha niya sa dihang namatikdan nga mura ug nag-porma ug letrang “L” ang gi-agian sa sunog, “Nagsugod sa wala nga bahin sa (Sto. Nino) chapel ang sunog ug unya mitabok kini sa pikas ug didto sa usab mipadayon ang kalayo.”

“Wala naapil ang kapilya sa pagkasunog ug mao na lay nahabilin,” siya midugang.

Samtang nagtindog tindog usab siya kauban ang staff sa Caritas, dunay miduol nga lalaki kinsa nagpaila nga taga Balingasag, Misamis Oriental siya ug miingon nga nidalikyat lamang siya sa maong dapit ug nagpasalamat nga nakit-an niya sila si Sr. Marissa tungod kay duna siyay gamay nga hinabang nga itunol alang sa mga nasunugan.