Pinasahi nga Senakulo sa Pasyon ni Kristo Parokya sa Sasa

Ang parokya sa St. Joseph the Worker Parish, Sasa mipahigayon na usab sa ilang tinuig nga pinasahi sa kaagi ni Kristo ngadto sa Kalbaryo.

Segun pa ni Sr. Maria Elenita A. Delfin, TDM, spiritual directress sa maong parokya, nga ang “Passion play” nga ilang gipahigayon mamahimong makatabang alang sa matinud-anon nga pagpamalandong alang sa Pagpasakit ug Pagpakamatay ni Hesus ngadto sa krus.

“Mas makahuluganon kun masaksihan ang aktwal nga pagpasakit ni Hesus pinaagi sa Passion play kaysa mabati lang”, sumala niya. Kini usab usa ka dakong paagi sa pagpahinumdom kanato sa pagpasakit ug pagkamatay ni Hesus didto sa Kalbaryo, diin siya maoy tinubdan isip buhing halad alang sa kaluwasan sa tanan.

Si Romel Pamplona, youth liturgy head sa maong parokya ug usa sa mga nagdumala niining passion play namahayag nga overwhelmed kaayo ang ilang gibati sa maong passion play… apan usa usab kini ka pahinumdom kanato ilabina sa mga kabatan-onan kung unsa ka bililhon ang gihimong pagsakripisyo ni Kristo Hesus kanato aron kita maluwas.

Kini masaksihan subay sa ilang pagsaulog sa byernes santo sa buntag sabay sa ilahang Via Crucis. (Brian Origenes)