Lukay: Kadaugan batok sa sala

Domingo sa Lukay
Is. 50:4-7/ Ps. 22/ Phil. 2:6-11/ Lk. 22:14-23:56

Kada tuig atong gisaulog ang Pagbendita sa mga lukay timaan sa madaugong pagsulod ni Hesus sa Jerusalem aron siya magpasakit alang sa atong kaluwasan ug buntogon ang kangitngit sa sala. Dunay tulo ka mga buhat ang gipakita karon sa Ebanghelyo aron mabuntog ang sala.

Una, ang dili paghukom. Si Kristo gihusgahan apan ang Dios dili maghusga. Si Kristo gipasakaan sa sumbong sa sala apan ang Dios nagdawat sa atong pagkamakasasala. Matud pa ni Santo Papa Francisco niining tuig sa kaluoy, likayan ta ang paghusga kay ang Dios dili maghusga sa unsay iyang makita lamang kay sayod siya nga luyo sa atong mga kahuyang adunay kaayo. Usahay matintal kita nga kinsa kadtong membro sa atong GKK nga dili aktibo ato dayong hukman o bisan ang membro sa atong pamilya nga wala mogradwar o napakayas, atong hukman.

Ikaduha, ang pagbasul sa sala. Si Kristo miingon sa mga babaye nga naghilak nga dili angay hilakan nila siya kondili ang ilang mga sala. Timaan kini nga ang kasubo sa sala nga atong nahimo ug ang paglikay niini maoy timailhan sa pagbasul. Usahay masubo kita sa nahitabo sa uban apan angay diay nato nga kasub-an ang atong mga sayop ug biyaan kini aron sa pagbag-o. Usahay matintal kita nga hikalimtan ang atong sala kay naanad na kita sa pagbuhat niini. Tig-a na usahay ang atong kasing-kasing tungod sa garbo ug pagdumot.

Ikatulo, ang pagpasaylo. Si Kristo bisan nagbitay sa krus wala naghuna-huna sa balus ug kadaut nga mahitabo sa mga naglansang kaniya kondili nag-ampo hinuon siya sa pasaylo kanila. Kasagaran, mangita gayod kita’g higayon nga makabalus sa nakasala kanato. Mohimo gayod kita’g mas sakit pa niadtong nakapasakit kanato. Palabwan pa gayod nato ang dili maayo nga nahimo sa uban kanato.

Niining Domingo sa lukay, magmadaugon unta kita sama kang Kristo sa dili paghukom, sa pagbasul, ug sa pagpasaylo. Ang mga lukay nga gibendisyonan magpahimangno unta kanato sa tibuok tuig sa pagdaug sa tanang kasal-anan.