Home Evangelization Program

Malipayon kaayong Pasko sa Pagkabanhaw!

Hinaot unta nga nagmakahuluganon ug mabungahon ang inyong Semana Santa. Nakatabang sa paglambo, bisan gamay lang, sa inyong kasantos, sa inyong pagkadiosnon. Sa ato pa, nigamay ang kadaotan ug mitubo ang kabuotan alang sa padayong panaw niining atong Hubileyo sa Kalooy sa tibuok Simbahan.

Ang Nobena sa Diosnong Kalooy, agi’g pagpangandam sa dakong Pangilin sa Dominggo sa Diosnong Kalooy sa ika-2 Dominggo sa Pagkabanhaw, nga karong tuiga mahitabo sa Abril 3, 2016, nagapadayon karong unang semana sa Pagkabanhaw. Hinaot unta nga ang matag usa kaninyo, nagaapil niini sa inyong kapilya o simbahan. Kon kini dili possibli, bisan sa panimalay lang uban sa inyong banay, mahimo usab. Labing mahinungdanon nga maghimo kita sa Nobena ug sa pagsaulog sa adlaw sa Pangilin, kay gipangayo gayud kini sa Ginoo pinaagi ni Santa Faustina, ang mensahera sa Diosnong Kalooy.

Usa nga apil sa apostolado sa Diosnong Kalooy dinhi sa atong Diyosesis sa Digos mao ang “Home Evangelization Program” (HEP). Di pa lamang dugay, malipayon kitang midawat sa sulat gikan sa National Office sa apostolado nga nagpahayag nga buot nilang ipabalik pagduso kining programa alang sa pamilya, nga kaniadto gipahunong usa, tungod sa mga dili maayo nga gidugang nga kalihokan labot niini, nga nakapabalaka sa tanan. Ang National Spiritual Director sa apostolado mismo, Rev. Fr. Prospero Tenorio, maoy naghangyo nga iduso na usab kini ilabi atol sa atong national Year of the Family and the Eucharist.

Nakita nga kining gipasiugdahan nga kalihokan sa Apostolado sa Diosnong Kalooy dinhi sa Pilipinas niadto pang 2010 haom kaayo nga kalihokan sa atong nasud karon diin nanlimbasog ang Simbahan nga adtoon ug bisitahan ang matag pamilya sa tibuok nasud ug sangyawan sa Maayong Balita sa kaluwasan.

Ako mismo, isip Obispo sa atong diyosesis, nagdasig sa atong mga deboto ug apostolado sa Disonong kalooy nga ipahigayon ug organisahon maayo ang katumanan nga maabot kining programa sa tanang pamilya nga andam modawat niini. Niadtong katapusang meeting sa Parish coordinators uban sa Diocesan Officers sa Apostolado sa Diosnong Kalooy, pinanguluhan ni Mrs. Evelyn Fabi, niadtong Mar. 13, 2016, ako nang gitagaan sila sa ilang “marching orders for immediate implementation.” Sa walay paglanganlangan, mangandam dayon aron ipahigayon ang diocesan workshop, lakip na ang mga materyales, alang sa mga Parish DMA HEP PROMOTERS.

Nagatoo ako nga kining programaha, mahimo gayud nga usa sa mga makatabang sa parokya sa pag “reach out” sa mga pamilya, ilabi na ang daghan nga nangundang na, nangabugnaw na, nagtinapolan na, sa pagduyog sa panaw sa pagtoo uban sa Simbahan. Ang tinguhaon nato mao nga sa dili pa matapos ang tuig 2017 ang tanang pamilya sa matag GKK sa atong diyosesis mabisitahan na, lakip na, bisan sila nga lahi og simbahan o tinuohan, apan magmadawaton sa debosyon sa Diosnong Kalooy.

Uban sa pangama sa atong mahal nga Inahan Birheng Maria, ang Inahan sa Kalooy, nagasalig ako nga magmalamposon kining atong hiniusang tinguha.