Domingo sa Pasyon sa atong Ginoo

(Excerpt of Abp. Valles’ homily on Palm Sunday 2016, San Pedro Cathedral)

Ang mga lukay nga atong gibitbit karon, nagsimbolo sa malipayong pagdawat nato sa pagsulod ni Kristo nga madaugon sa Jerusalem. Ang maayo nga lukay mao kadtong nakasugod gayod ganina sa pagbendita sa wala pa ang Misa. Ang pagbendita niini apil man sa rito sa Misa. Mao nga kung kamo mosimba ug magbitbit sa inyong mga lukay, mas maayo nga moabot kamo sa wala pa magsugod ang misa ug makaapil gayod sa rito niini.

Apan sayod ta nga human niining misa, aduna gayo’y moduol ug mohangyo nga magpabendita. Unta dili kini angay apan aron dili sila mahiubos ato na lang pud benditahan. Apan kung kining lukay nga atong gibitbit sama sa remembrance kung kita nakaapil ug nakaadto gayod sa panahon nga si Kristo misulod sa Jerusalem, angayan unta nga dili kini pinalit lamang o kinuha lamang nato diha sa mga daplin o tindahan. Angayan unta nga nakaapil gayod kita.