Ayaw paghukom

Ika-Lima nga Domingo sa Kuwaresma
Is. 43:16-21/ Phil. 3:8-14/ Jn. 8:1-11

Usa ka batasan sa tawo nga dili angay pamarisan sa uban mao ang pagbulgar sa sala sa usa ka tawo diha ngadto sa uban. Usahay mahimo nang kahiligan sa uban tungod kay wala na’y mabuhat nga lain.

Karong domingoha, gipamatuod sa atong ebanghelyo ang gisaysay sa atong pasiuna. Usa ka babaye nga nadakpan sa usa ka buhat nga pagpanapaw. Gidala kini sa mga Pariseo ug Magtutudlo sa balaod kang Kristo Hesus aron ikapahamtang ang silot diha sa babaye – nga batoon kini sumala sa balaod ni Moises.

Niining buhat sa mga Pariseo ug Magtutudlo sa balaod – gipakaulawan nila ang babaye sa kadaghanan. Wala nila respituha ang pagkatawo sa babaye. Alang kanila ang mahinungdanon masilutan ang nakasala. Dili sila sinsitibo kon unsa man ang bation sa babaye.

Apan sukwahi ang panglantaw ni Hesukristo sa kahimtang sa babaye nga makasasala. Gibati gayud niya ang kalooy ngadto sa babaye. Mao nga alang kang Hesus – kon kinsa man ang walay sala maoy unang mo bato sa babaye nga nakasala. Niadtong higayuna gibati gayud sa tanan nga anaa didto ang kaulaw. Kay naamguhan nila nga sila usab makasasala. Niining higayuna usab nagiyahan ni Kristo ang mga pagbati ug mga paghukom sa mga Pareseo ug sa Magtutudlo sa balaod nga makaamgo nga sila usab adunay mga kahuyang ug wala sila’y katungod sa paghusga sa ilang isigkaingon.

Ang nakaanindot kang Kristo – wala niya mabatasan ang pagsarado sa iyang kasingkasing sa mga makasasala. Hinonoa nagpabilin kining andam sa gihapon sa pagdawat sa mga gustong mobalik kaniya. Kay mao gayud kini ang iyang misyon nga gihatag sa Dios Amahan kaniya nga dili siya kawad-an bisag usa sa gisalig Kaniya sa Langitnong Amahan. Gani mao kini ang hinungdan nga nagpakamatay siya sa Krus aron lamang sa pagluwas sa katawhan sa Ginoo diha sa pagkasala.

Mao nga dili matago ang dakong kalooy ni Hesus sa babaye nga nadakpan nga nanapaw. Dili gayud niya mabuhat ang paghusga kaniya. Tungod kay Dios siya nga may kinaiya sa paghatag og paglaum ug laing kahigayunan sa pagbag-o ang makasasala. Dako pa gihapon ang iyang pagtoo nga mabag-o kini. Kay dili makalimod nga may gasa ang tawo sa pagka-maayo nga gikan sa Ginoo ug mao kini ang gilantaw ni Kristo nga ang tawo may paglaum nga mahimong maayo pag-usab. Kini mahitabo gayud kay aduna kita’y Ginoo nga puno sa kaayo ug buotan pa gayud.

Busa agi’g pagpangandam nato sa atong kaugalingon sa umaabot nga semana santa – mas maanindot likayan nato ang pagpanghusga sa uban nga nakabuhat ug kamalian. Kay ang ato ganing Ginoo nagmanggiloy-on sa babaye nga nakasala, nga mihatag man gani kaniya sa gasa sa kagawasan. Kita pa kaha, magmagahi sa atong kasingkasing sa paghatag og kalooy sa mga nakasala kanato.

Mga igsoon, alang sa atong kasayuran – mas maka-Dios ug balaanong buhat kon magmasinabtanon ug madinawaton kita sa atong isigkaingon. Kay nianang paagiha gibuhi nato pag-usab ang buhat ni Kristo Hesus nga abli ang kasingkasing sa mga makasasala nga gustong makatagamtam pag-usab sa gugma ni Kristo. Kay ang pagbuhat nato sa ingon, usa paagi sa pagpasalamat sa Dios sa iya usab nga paghatag kanato ug paglaum nga makabalik diha kaniya.