Ang Sakramento sa Pakig-uli sa Panahon sa Kwaresma

Kunus-a ka katapusang nangumpisal, igsoon? Kapila pud ka mangumpisal sa usa ka tuig? Aduna bay nagapakompisal kanunay sa inyong simbahan? Nagapahibalo ba sila kon kanus-a ug asa dunay pagpakompisal? Unsay mga dayag nga timaan nga mapaghiuli ang inyong simbahan?

Kini ang pipila ka mga pangutana nga mahinungdanon labot sa sakramento sa pakig-uli. Oo, sakramento sa PAKIG-ULI. Dili sa PAKOMPISAL.

Sa panahon sa Kwaresma, ang pagsaulog sa Sakramento sa Pakig-uli gihatagan og pagtagad, isip usa sa mga pagpangalagad sa Simbahan aron ang mga magtotoo nga mahinulsulon, makasinati sa kalooy ug kapasayloan sa Dios sa ilang mga sala. Ang Kwaresma maoy haom kaayo nga panahon sa paghinulsol ug pakiguli sa Dios ug sa isigkatawo. Apan, dawaton nato ang kamatuoran nga gamay lang gihapon ang magsaulog sa sakramento sa pakig-uli, bisan og Kwaresma. Daghan pa gayud gihapon ang wala nahibalo ug naghatag bili ug nagpahimulos niining mahinungdanon kaayong sakramento.

Sumala sa paginambitay namong mga pari, sa among workshop bahin sa maong sakramento niadtong Peb 8-9, naamguhan nga nagkulang gayud sa dugay na nga panahon ang pagpahigayon sa maayong katekesis bahin sa Pakig-uli / Pagbag-o ngadto sa mga bata, batan-on, ug mga hamtong ug edaran. Gawas sa bahin sa pagpangumpisal, wala matagai og pagtagad ang laing bahin sa Sakramento, sama sa, paghinusol, pagpenitensiya, pagpasaylo, ug pagbiya sa daang kinabuhi ug magbag-o.

Magsugod ang panaw sa pakig-uli diha sa paghinulsol sa “akong sala, akong sala, akong dakong sala.” Human sa pakighinagbo kang Kristo, ang pinadayag sa Diosnong Kalooy, iyang nadungog, nakita, ug nahikap ang iyang mga samad, maaghat ang tawo nga mapailubon ug mahinulsulon nga angkonon ang iyang mga sala batok sa Dios nga Maloloy-on sa tanan ug batok sa iyang kaigsoonan. Mobangon siya ug mobalik sa Dios ug sa iyang igsoon. Kasinatian kini sa kasingkasing nga mahinulsulon. Dili bunga lamang sa hunahuna ug pagbati. Galamhan sa tawo nga natandog sa Spirito sa Dios.

Sunod, mangayo siya og pasaylo. Mapaubsanon ug mangahas siyang tunlon ang iyang garbo ug kaulaw ug mangayo og dispensa. Sa ato pa, mangompisal. Kinahanglan inubanan kini sa panaad nga magbag-o ug mobiya sa sala ug sa mga higayon niini.

Ikatulo, dawaton ang pasaylo sa Dios pinaagi sa ministriya sa Simbahan, ug ang penitensya nga ipahamtang sa ministro, nga nagtimaan sa katuyuan nga bayran ug biyaan na ang pagpakasala. Dinhing bahina mahingpit ang proseso. Makompleto unya kining yugto sa pakig-uli niining bahina — ang pakig-uli ug pagbag-o.

Ang among mga Kaparian sa Diyosesis sa Digos nakaamgo nga ang Katekesis sa Sakramento sa Pakig-uli kinahanglan malangkobon sa tanang bahin ilabi na ang katuyaun ug bunga nga gitinguha sa Dios pinaagi sa maong sakramento — Pakig-uli / Pagbag-o. Gikinahanglan pud, nga ang pamaagi sa pagsaulog dili lang pud nasentro sa pangompisal kon dili sa kinatibuk-an nga proseso.

Busa, gihangyo ang Diocesan Catechetical ug Formation Center (DCFC) nga bag-ohon ang mga kahimanan sa katekesis sa sakramento sa pakig-uli ngadto sa mga bata, batan-on, hamtong ug edaran.

Ang Diocesan Liturgical Center (DLC) gihangyo usab nga maghimo og bag-ong ritwal sa sakramento basi sa nabag-o na nga rito sa tinagsa nga pakig-uli sa mga mahinusulon, aron kini masugdan na sa paggamit sa mga parokya.

Kapin pa niini, gisangon pud sa DLC ang paghimo ug lainlaing ritwal sa pakig-uli sa daghang mga mahinulsulon nga dunay tinagsa nga pangompisal, nga gamiton sa lainlaing panahon sa liturhiya ug okasyon. Sa ingon ang maong katilingbanong kasaulogan mahimong higayon sa paghatag og maayong katekesis.