Walay laktud sa langit

Ikaduhang Domingo sa Kwaresma
Gen. 15:5-12, 17-18 / Ps. 27 / Phil. 3:17-4:1 / Lk. 9:28-36

Aduna gayoy puruhan nga atong himuon ang mga butang diha sa laktud o short cut nga pamaagi. Usahay ang estudyante i-copy paste na lang aron dili na magsulat; ang paglukat ug mga papeles bayaran na lang aron dili na maglinya; ang kalaban nga mortal sa politika patyon na lang. Kining tanan temtasyon ug tawhanong kahuyang sa paglikay sa proseso ug paghimo sa laktud nga pamaagi.

Apan alang sa Dios, ang kinabuhi usa ka proseso. Kung buot kitang mahilangit, kinahanglan kita nga moagi sa inanay nga paghamtong sa proseso sa paglawig sama kang Kristo. Dili kita makalikay sa mga pag-antus nga kabahin sa paglawig sa kinabuhi kung buot kita nga mosangko gayod sa langit.

Mao kini ang hinungdan nga gipakita ni Kristo ang iyang mga tinun-an sa kausaban sa iyang panagway. Gipasabot niya nga ang pag-antus ug kamatayon nga iyang masinati, kabahin lamang sa dili makatupong nga ganti sa himaya nga iya unyang maangkon. Walay ikakumpara sa kahinlo ug kaputi sa kumpletong kalipay sa kinahiladman ang maangkon niya human siya magpasakit. Mao nga wala manumbaling si Kristo sa gibati ni Pedro sa tintal sa pagpabilin na lamang niadtong nindot nga kasinatian ug sa dili na paglawig sa dalan padulong niadtong maong kadaugan.

Kining maong proseso gisimbolo sa kangitngit nga nasinati ni Abraham diha sa unang pagbasa ug sa sakripisyo sa pagpikas sa mga mananap nga gihalad. Bisan ngitngit ug sakit nga kita mapikas usahay sa mga pagsulay ug kapait sa kinabuhi, mahigmata ra kita nga giluwas na unya ug gipanalanginan sa Ginoo.

Bisan si San Pablo sa ikaduhang pagbasa, midapit kanato sa pagsunod sa iyang panig-ingnan, sa paglikay sa tawhanong kailibgon ug pagpasigarbo. Gilig-on kita niya aron dili kita malaglag kondili mailisdan ang atong lawas sama kang Kristo.

Malisod man o langan o masakit ang atong masinati, kung kini puno sa pagtuo ug kamatuoran, kita unta niini magmalig-on ug dili magpatintal kay walay laktud sa langit.