Parokya sa Santiago Mitunol sa Tabang Alang sa DXGN 89.9 Spirit FM

Sobra sa 40 ka mga Pangulo sa Katilingban sa nagkalain-laing GKK sa Parokya sa Santiago, Bunawan ang mipadayag sa ilang pagsuporta sa kampanya alang sa pagpakaylap sa Maayong Balita pinaagi sa Davao Catholic Herald ug sa DXGN 89.9 Spirit FM.

Sa ilang matag duha ka bulan nga panagtigom sa PSK, gipasabot ni Fr. Ritsche Gamaya, Direktor sa Archdiocesan Commission on Social Communications ang Dekrito sa Social Communications diin gilatid ang kamahinungdanon sa paggamit sa mass media alang sa pagpakaylap sa Maayong Balita.

Lakip sa maong seminar mao ang paglista sa konkreto nga mga aksyon nga pagabuhaton isip usa ka GKK Servant Leader ug isip usa ka katilingban sa GKK. Nagkahiusa ang mga PSK nga gikinahanglan nga magbaton gayud sila ug kopya sa Davao Catholic Herald ug mag-agni sa ilang mga katilingban nga maminaw sa DXGN 89.9 Spirit FM.

Ang mga GKK sa nahisgutang parokya maoy usa sa mga nag-unang positibong mitubag sa kampanya nga “25 ko Para sa Radyo Ko” coin bank. Sa maong okasyon, gitunol usab nila ang mga natigom nga mga napuno nga botelya sa mga sinsilyo isip ilang tampo alang sa misyon sa pagpakaylap sa Maayong Balita.