OLLP Magpahinungod alang sa mga Masakiton ug Katigulangan

Dungan nga pahinungdan sa parokya sa Our Lady of Lourdes sa Bangkal ang mga masakiton ug katigulangan atol sa ilang adlaw sa Kapistahan karong Pebrero 11, 2016.

Gitakda sa alas 7:30 sa buntag pagahimoon ang usa ka Santos nga Misa alang sa mga masakiton ug katigulangan. Ang World Day of Sick and Aged usa ka selebrasyon diin nagsugod kang Saint Pope John Paul II isip usa ka pamaagi sa mga magtutuo nga mag hatag og mga pag-ampo alang sa mga katawhan nga naga antos sa mga sakit, ug sa mga katigulangan nga naga antos sa ilang ka kahuyang ug ang mga pinasagdan sa ilang kaugalingong pamilya.

Kauban sa maong selebrasyon ang pagpangandam sa mga kalihokan nga pagatambongan sa mga miyembro sa GKK ug mga lider sa parokya.

Sa umaabot nga Pebrero 12, 2016, dunay ipahigayon nga GKK Night. Kini usa ka selebrasyon sa matag miyembro sa GKK inubanan sa mga lider sa parokya nga magpasundayag og cultural show.

Sa umaabot nga Pebrero 14, 2016, dunay regular Sunday mass. Ang maong misa magsugod sa alas 7:30 sa buntag nga gipangulohan ni Archbishop Romulo Valles. (Irven John Valenzuela)