Nia kanato ang desisyon

Unang Domingo sa Kwaresma
Dt. 26:4-10/ Ps. 91/ Rom. 10:8-13/ Lk. 4:1-13

Kinsa ba kanato ang wala gitintal? Kinsa kaha kanato ang wala makasinati sa panagbangi sulod sa atong kaugalingon sa pagpili sa maayo o dautan?

Niining unang Domingo sa Kwaresma, nadungog nato sa Ebanghelyo nga si Kristo bisan Dios gitintal. Nakasinati siya sa pagtimbang-timbang sa pagpabilin sa unsay maayo o pagsunod sa dautan. Apan wala siya natintal ug nagpabilin siya sa kaayo. Sama ni Kristo kita usab makasinati sa tutulo ka mga dagkung temtasyon.

Una, ang temptasyon nga materyal. Sama nga si Kristo gitintal diha sa higayon sa iyang kagutom, kita usab usahay tentalon taliwala sa atong pagkulang sa materyal nga panginahanglan. Dili ba ang uban mangawat ug mamakak na lamang tungod kay wala silay makaon? Dili ba ang uban masina ug magselos tungod kay ang uban dunay naangkon apan sila wala? Diha sa atong pagkulang o kagutom sa nagkalain-laing paagi ang yawa motintal kanato sa pagbuhat sa sala. Apan sama kang Kristo, andam ba kita nga mosalig sa Dios?

Ikaduha, ang temtasyon sa gahum. Sama kang Kristo, kita usahay tintalon nga dili magpalupig ug magpalabaw. Usahay ipakita gayod nato nga kita kanunay ang sakto ug sundon. Lisod ang pagpaubos. Dili ba tungod sa pangandoy sa gahum usahay ang tawo magdumot ug mopatay? Dili ba tungod sa pagkaulipon sa gahum ang tawo magpabiling garboso ug dili motimbaya sa isigkatawo? Diha sa paghuna-huna nga kita mas gamhanan kaysa uban, kita mapukan tungod kay Dios lamang ang adunay tiunay nga gahum. Andam ba kita modawat sa atong kahuyang aron ang gahum sa Dios mapatin-aw?

Ikatulo, ang temtasyon sa kaisog. Sama nga si Kristo gisukod unsa kaisog nga mosalig sa Amahan, kita usab usahay tintalon sa sobrang pagsalig nga dili na lamang mogamit sa atong saktong huna-huna. Dili ba daghan sa atong mga igsuon napukan o nadisgrasya sa sayop nga paghuna-huna nga sa ilang kaisog walay makapildi kanila? Dili ba ang sobrang pagsalig sa kaugalingon magdala sa kapildihan? Dili nato sulayan ang Dios sama nga si Kristo wala nagpadala sa pasalig sa dautan.

Himuon unta nato ang riyalidad sa temtasyon nga kahigayonan sa paglambo ug pagtubo sa pagtuo. Dili ta makalikay sa presensiya sa temtasyon apan naa kanato ang pagmalig-on aron kita modesisyon sa pagpili sa kaayo inay sa dautan.