Love is Our Mission: The Family Fully Alive

Duyog sa selebrasyon sa YEAR of the FAMILY, ang Immaculate Conception Parish, Mintal nagpatigayon ug panagtapok sa mga Marriage Enrichment graduates sa mga nakalaing-laing tuig sa miaging Domingo, Enero 31. Gipasiugdahan kini nga aktibidad sa Family & Life Apostolate ug gisuportahan ni Fr. Jovil. Sa pagpadayag sa iya mensahe, makadasig paminawon ang iya pangutana “Sa unsang pamaagi makatabang ang parokya sa inyo nga mga graduates sa MES?”

Gilangkuban usab sa tibuok hapon nga programa ang pag-imbita ug mga mag-asawa aron ipaambit ang ilang kasinatian sa kinabuhing pamilya. Kung si Andres Bonifacio nakigbisog pinaagi sa KKK, ang mga mag-asawa nakigbisog usab diay sa ilang paglawig sa kaminyoon, mga miyembro sa KKK…KASAKIT, KALIPAY ug KALAMPUSAN!

Ang mga nagpaambit, mao ang mga mag-asawang: Florence & Danny Azate, MES graduate 2005 sa Assumption Parish, sobra 10 ka tuig nga minyo, miabot ug 8 ka tuig ang ilang panag-uban una gigrasyahan ug 2 ka anak, salamat sa NFP…Adel & Cherry Pie Bernadas, 1st batch MES graduate sa Holy Family Parish tuig 2005, 32 ka tuig na minyo ug adunay 2 ka anak…Romy & Beth Austria, MES graduate 1986, sobra 50 ka tuig ang kaminyoon, 2 ang mga anak.

Sa ilahang tulo, nagpatibabaw ang kalampusan sa mga problema, kay gihimo nga ang GINOO maoy sentro sa ilahang mga kinabuhi. Ang sikreto pud nga milungtad sila, mao ang kalipay diha sa pag serbisyo sa simbahan.

To GOD be the glory!