Formators alang sa Voters’ Ed gibansay na

Gipahigayon sa Arkidyosis sa Dabaw ang unang bahin sa political education trainer’s training isip pagpangandam sa umaabot nga Piniliay 2016.

Pinangulohan sa Archdiocesan Social Action Center (ASAC) of Davao, 44 ka mga laykong lideres gikan sa nagkalain-laing parokya ang mitambong sa maong pagbansay nga gihimo sa St. Joseph the Worker Parish sa Sasa.

Sumala sa ASAC Director nga si Fr. Leonardo Dublan, Jr., ang maong training nakasentro sa pagpasabot sa kalabutan sa Simbahan mahitungod sa politikanhong lihok sa nasud ilabi sa panahon sa piniliay.

Dugang niya nga kinahanglan musalmot ang mga laykong lideres sa mga panghitabo sa politika tungod ila kining katungod isip Pilipino ug isip mga binunyagang Katoliko.

“Dili optional ang politika ug dili kita maka-ingon nga dili kini kabahin sa atong kinabuhi isip mga Katoliko,” sumala ni Fr. Dublan sa pakighinabi sa DCHerald.

Si Susan Toreno, vicariate coordinator sa Parish Social Action Ministry sa St. James Vicariate miingon nga dako kaayo ang tabang sa maong training aron mas mapasabot sa katawhan ang kalabutan sa Simbahan.

“Sa ilang kasing-kasing kahibalo na sila kung kinsa ang angayan nga botohan ug dili na sila madala sa pagpalit sa ilang mga boto,” sumala ni Toreno mahitungod sa mga botante karong panahona.

Ang trainers’ training himoon sa tulo ka higayon ug ang nagpabiling mga adlaw himoon sa ubang parokya sa Arkidyosis sa Dabaw.