10 ka Tulumanon alang sa Piniliay 2016

Ang tinguha sa Kristohanong katilingban mao ang pagkab-ot sa matarong, husay, malinawon, ug katoohan nga piniliay. Ang Simbahan dili lamang magatudlo niini apan kinahanglan usab nga molihok alang sa katumanan niining pangandoy. Kinahanglan siya nga molihok subay sa kamatuoran, kaangayan, gugma ug kagawasan aron mahimong dayag nga panig-ingnan sa katilingban sa maayong pagkalungsuranon. Busa, ang mga magtotoo kinahanglan magpakita sa ilang pagtahud sa mga balaod, ug sa pagtuman gayud niini.

Busa ania na usab ang 10 ka tulumanon nato alang sa PINILIAY 2016:

1. Walay Mangayo! Ang tanang magtotoo, mga GKK, mga Parokya, o lain nga institusyon sa Simbahan, gidid-an nga mangayo ug magsolicit og tabang o donasyon gikan ni bisan kinsang mga kandidato ug ang ilang mga nagsuporta kanila, alang sa bisan unsang katuyuan, sa panahon sa pangampanya hangtod matapos ang piniliay. Dili kita modugang sa galastohan sa mga kandidato sa panahon sa kampanya.
2. Walay Modawat! Gidili usab sa tanang hut-ong sa Simbahan, bisan wala mangayo, sa pagdawat, (bisan wala mangayo) sa bisan unsang kantidad, tabang o donasyon alang sa bisan unsang katuyuan gikan sa mga kandidato o mga nagasuporta kanila, sa panahon sa kampanya hangtod sa pagtapos sa piniliay. Tabangan nato ang pagkab-ot sa gawasnon nga pagboto.
3. Magpalit o Magpugong sa pagboto ug ang mobaligya og boto. Ang katungod ug gahum sa pagboto usa ka sagradong gasa ug kaakuhan. Sila nga magpanamastamas niini pinaagi sa pagpalit ug pabaligya og boto o pagpugong sa uban nga moboto, makasala og dako batok sa ilang kaugalingon, sa ilang pamilya, ug katilingban. Gawas pa niini, supak kini sa balaod sa piniliay. Ug labaw sa tanan makasala sila sa Diyos. Ang matarong nga piniliay magbunga og matarong nga pamonoan ug panggamhanan. Ang kadaugan sa Piniliay pinaagi niini mahisama sa pagpangawat sa kadaugan, ug dili magbunga og tinuoray nga pagpangalagad sa katawhan.
4. Ang balaod sa Simbahan nagdili sa mga diakono, pari og obispo nga moapil sa pamolitika sa mga partido. Nagpasabot kini nga gidili kanila ang mosoporta ug mangampanya alang kang bisan kinsang kandidato, sa binsang unsang paagi, sa bisan unsang hinungdan, bisan asa ug bisan kanus-a, tungod sa ilang katungdanan sa Simbahan isip mga alagad sa kahiusahan sa tanang katawhan.
5. Ang mga Sakramento ug mga Sakramental kinahanglan dili magamit alang sa pagkampanya alang sa mga kandidato aron kalikayan ang lain nga pagsabot niini. Dili magsponsor pagsaulog sa mga sakramento sa panahon sa kampanya.
6. Ang mga laykong katoliko giawhag ug gidasig nga mangilabot sa politika sa paagi nga partisan o non-partisan. Katungod ug katungdanan nila kini isip mga lungsuranon ug mga Krisityanos, ang pagsalikway sa dautan ug tradisyonal nga pamolitika, alang sa pagpatunhay sa bag-ong kultura sa politika dinhi sa atong nasud.
7. Gidasig ang mga magtotoo sa pagtabang ug pagsuporta sa mga paningkamot sa Parokya ug Diyosesis ug laing mga grupong sibiko nga buot motabang sa mga lungsuranon sa hinayagan, responsable, ug gawasnon, nga pagboto.
8. Kon dunay mga laykong nangalagad sa Simbahan moapil sa partisan politics, kinahanglan sila nga maghimo’g “leave of absence” sa katungdanan nila sa Simbahan gikan sa pagsugod sa pagkampanya hangtod matapos ang piniliay. Sa ingon niini, dili mabiyaan, o mabahiran og pamolitika ang ilang padayong pagserbisyo.
9. Ang mga boto sa mga tawo kinahanglan bantayan. Ang piniliay kinahanglan nga klaro ug katoohan. Ang resulta sa piniliay kinahanglan nga maghatag ug dayag ug kusog nga pagtuboy sa mga domadaug, bisan kinsa man sila, aron nga makadumala sila nga malinawon ug epektibo. Ang tanang lungsuranon, botante man o dili, giawhag nga magtinabangay alang sa malamposong piniliay karon.
10. I-ampo matag adlaw ang “Oratio Imperata” alang sa Piniliay diha sa inyong mga panimalay, sa inyong katilingban, sa inyong mga kapelya, ug sa inyong simbahan, sa inyong tulunghaan, sa inyong mga gipanarbahoan. Ang makanunayon ug mapaubsanong pangaliyupo, dunggon gayud sa Diyos nga maloloy-on sa tanan.

PAHIMANGNO:

ANG BISAN KINSA NGA MOSUPAK SA NUMERO 1 UG 2, MAHIMO NGA MAPAHAMTANGAN OG SILOT KON MAPAMATUD-AN SA KURA PAROKO NGA SAD-AN. ANG KURA PAROKO MAOY MOINDOSAR SA OBISPO ALANG SA PAGPAHAMTANG OG SILOT. ANG SILOT IPAHAMTANG SA HINGTUNGDAN NGA LIDER O SA KATILINGBAN, DEPENDE SA KASO.