Tuig sa kaluoy

Sa binulan nga tigum sa mga kaparian kon Presbyterium meeting sa Arkidyosis sa Davao niadtong Enero 11, gipangulohan ni Yanong Muloy, Arsobispo sa Davao, Romulo G. Valles, D.D., ang mga kaparian diha sa pasiunang pagplano sa mga kalihukan sa Tuig sa Kaluoy.

Gipaabot ni Yanong Muloy sa mga kaparian ang pipila ka mga punto sa sulat ni Santo Papa Francisco nga Misericordiae Vultus nga nagkanayon: “Gitawag kita sa pagpakita sa kaluoy kay kanato man unang gipakita ang kaluoy” (MV 9). Gipasabot ni Yanong Muloy nga ang mga kaparian kinsa maoy unang gikaluy-an, mao usab ang angayan nga mopakita ug kaluoy sa katawhan.

Gipadayon ni Yanong Muloy nga “ang kaluoy maoy pundasyon sa kinabuhi sa Simbahan. Ang tanan niyang kalihukang pastoral kinahanglan maputos sa kalumo nga iyang gihimong maanaa sa mga magtotoo; walay bisan usa diha sa iyang pagsangyaw ug pagsaksi ngadto sa kalibutan nga nagkulang sa kaluoy” (MV 10).

Siya mipadayon sa hagit nga “miabot na ang panahon nga ang Simbahan mopas-an sa malipayong tawag sa kaluoy pag-usab” (MV 10). Karon na ang panahon sa malipayong kaluoy ngadto sa isigkaingon. Kita nga nagaanan sa atong kabug-at pinaagi sa pasaylo sa Ginoo maoy angayan nga unang magpuyo ug mopaambit niining maong kagaan nga dala sa kaluoy ngadto sa uban.

Gipalawman ni Yanong Muloy ang pamalandong sa kaluoy nga ato untang mabatasan diha sa atong mga katilingban. Gitapos niya ang hagit pagkutlo sa mao gihapong sulat ni Papa Francisco: “Sa atong mga parokya, katilingban ug asosasyon, buot pasabot, bisan asa anaay Kristiyanos, didto usab ang bisan kinsa makakaplag ug kadangpan sa kaluoy” (MV 12).

Padayunon ang pagplantsa sa han-ay sa plano sa mga kalihukan sa Tuig sa Pagtuo uban sa mga kaparian, mga laykong liders ug mga relihiyoso.