Pulitiko sa una, Pari na karon

“Malipayong gigakus ang duha ka kalibutan,” mao kini ang nasinati ni Fr. Severo “Jong” Biton, Jr. Nahimo siyang municipal councilor sa Basilan sulod sa unom ka tuig (1992-1998) human siya nagtuon ug nahuman sa abogasya sa University of San Carlos, Cebu City. Wala man mipasar sa bar examination, nakahuman siya sa kursong AB Political Science sa Zamboanga tuig 1987. Ikaunom sa siyam ka managsuon, si Jong natawo ug midako sa Isabela, Basilan. Wala kaayo namatikdan ni Jong ang kagubot sa iyang palibot tungod kay anaa siya sulod sa 4,000 hektarya land grant sa UP, Sta. Clara. Didto siya nag eskwela ubos sa pagdumala sa Claretian Missionaries. “99% ang Kristiyanos nga estudyante,“ sumala pa niya.

Nagdaku nga Romano Katoliko, ang pagbisita sa ilang panimalay sa mga madre ug pari ang naghatag kaniya ug panimuot sa relihiyosong pagtoo.

Iyang nasabtan ang tawag sa pagkapari sa dihang miapil siya sa Maturing in Christ Seminar nga gidumala sa Claretian Missionaries. Giawhag siya nga mamahimong Claretian Missionaries human sa high school, apan misupak ang iyang inahan. Busa siya gi-train sa pagdumala sa maong seminar.

Usa pud siya ka delegado sa World Youth Day sa Pilipinas niadtong 1995 ug dinhi niya nahikaplagan ang iyang trabaho sa ministriya isip usa ka pari. Nagsugod siya ug pangita ug seminaryong iyang sudlan, hangtud sa nailhan niya ang Societas Verbi Divini or SVD tungod diha sa iyang pagtuon sa abogasya sa San Carlos Unviersity – Cebu, gidumala sa SVD ang maong eskwelahan.

Misulod sa SVD niadtong 2002 isip Associate (late vocation) sa Christ the King Mission seminary sa Quezon City. Naordinahan isip diakono sa Abra tuig 2008, ug sa presbyterate ordination niadtong ika-5 sa Disyembre 2009.

Karon padayon ang pagserbisyo si Fr. Jong isip Vocation Director sa Divine Word Formation Center – Davao.