Partner

Ikalima nga Domingo sa Ordinaryong Panahon
Is. 6:1-2, 3-8/Ps. 138/1 Cor. 15:1-11/Lk. 5:1-11

Ang mga ahente karon sa mga negosyo dili na ahente ang tawag, kondili partner na. Ang mga bangko kaniadto nga ka-kompetensiya, karon partner na. Bisan ang mga politiko nga kaniadto kalaban, karon kaalyado ug partner na.

Daghan gayod ang maayong mahitabo kung isipon nato ang matag usa nga partner. Sa unang pagbasa, ang Dios nakig-partner sa tawo. Siya nagpaamgo kang Isayas sa iyang kaalaot. Siya nagpasaylo kaniya. Ug si Isayas mitubag: “Ania ako, ipadala ako”.

Sa ikaduhang pagbasa, si San Pablo nahimong partner sa Dios ug sa tawo. Nahimo siyang partner sa Dios kay gitudlo man niya ang mahinungdanong nadawat gikan kang Kristo. Nahimo siyang partner sa tawo kay para kaniya dili mahinungdanon kung siya ba ang nagwali o sila, kondili ang mahinungdanon mao nga kita adunay pagtuo.

Sa Ebanghelyo, ang mga tinun-an nahimong partner sa Dios sa dihang misalign sila kang Kristo. Sa dihang giingnan si Simon ni Kristo sa pagtaktak sa ilang pukot, si Simon mitubag: “Magtutudlo, tibuok gabii kaming nganisda ug wala gayod kami nakuha, apan kay sugo man nimo, akong itaktak ang mga pukot.” Tungod kay nakig-partner man kang Kristo sila Simon ug mga kauban, nakakuha sila’g daghanan kaayong isda nga hapit na gani magisi ang ilang mga pukot. Nakig-partner usab sila Simon sa ilang laing mga kauban sa usa pa ka sakayan. Ug si Simon gipahimangnoan ni Hesus nga dili na mahadlok kay managat na siya ug mga tawo.

Sa atong mga paningkamut, giisip ba nato nga partner kanunay ang Ginoo o misalig lamang kita sa atong kahanas ug kahibalo? Sa atong mga pagplano ug mga aksiyon o buluhaton, giapil ba nato nga atong partner ang Ginoo sa pagpatuman niini o nagtuo lamang kita nga mahimo kining tanan sumala sa atong kahawod? Sa atong mga responsibilidad ug katungdanan, gihatagan ba nato ug higayon ang atong kauban sa panimalay man o trabahoan nga partner sa atong mga desisyon o gi-solo lamang nato ang tanan? Misalig ba kita sa miyembro sa atong pamilya o katilingban nga atong partner aron molampus ang atong misyon ug tahas o giduphan lamang nato ang tanan?

Mas sayon ang buluhaton kung aduna kitay kauban o partner. Ang atong paningkamut mahimong mas gaan kung ang katilingban ug si Kristo mismo atong partner.