Panaghiusa sa GKK gipakita sa Sinulog Festival

KAPUTIAN, IGACOS—Bisan usa kini ka kumpetisyon, dayag nga gipakita sa mga miyembro sa Gagmay’ng Kristohanong Katilingban (GKK) ang ilang panaghiusa sa malampusong pagpahigayon sa ika-3 Sinulog Festival sa Sto. Niño Parish sa Kaputian.

Atol sa pagsaulog sa ika-33 nga kapistahan niadtong Enero 17, gipahigayon usab ang ika-tulong tuig sa pagsaulog sa Sinulog Festival nga nahimong usa sa mga highlights nga gisalmotan sa mga nagkalain-laing distrito nga sakop sa parokya.

“Mas molungtad ang panaghiusa kay sa kumpetisyon gipangandaman gayud ni sa mga miyembro sa mga GKK ug sila mismo misuporta sa maski unsang paagi aron naa silay entry sa Sinulog Festival,” sumala ni Sheela Fe Algabre, miyembro sa Parish Youth Apostolate.

Pito (7) sa 12 ka mga distrito sa parokya ang misalmot sa maong kumpetisyon diin gipakita pinaagi sa pasundayag ang kasaysayan sa Kristiyanismo sa Pilipinas sama sa tinuig nga kasaulogan sa Sinulog Festival sa Cebu.

Nakuha sa Distrito sa Adecor ang first prize nga P20,000. Misunod ang Tagbaobo District nga nakadawat og P10,000 ug ang Sta. District nga nakadawat og P7,000. Nakadawat usab og P4,500 nga consolation prize ang matag distrito nga mitambong sa kumpetisyon.

Dako ang pasalamat sa kura paroko nga si Fr. Rico Enriquez nga malampuson nilang napahigayon ang ilang kapistahan ug ang Sinulog Festival tungod sa suporta ug kahiusahan sa mga parokyano ug mga benefactors nga migahin sa ilang panahon, talento ug pinansyal nga suporta alang sa parokya.

Dugang usab niya nga ang maong Sinulog Festival gisugdan ug gipahigayon gayud sa parokya ug gisuportahan sa ubang sektor sa komunidad sama sa lokal nga panggamhanan, business sector ug uban pa ug sumala niya, andam na sila nga magpahigayon sa sunod tuig nga Sinulog Festival.

Giingon usab niya nga angay lamang nga puy-an sa tanan ang kinaiya sa pagpaubos nga maoy hiyas nga gipakita sa ilang patron nga si Sto. Niño ug nga mao usab ang mensahe sa ilang tema karong tuig nga: “Timan-i Ninyo Kini: Ang dili modawat sa paghari sa Dios sama sa usa ka bata, dili mahisakop niini” (Mk 10:15).

Gawas sa Sinulog Festival, dako usab nga selebrasyon ang Misa sa adlaw sa kapistahan nga gipangulohan sa Arsobispo sa Dabaw, Archbishop Romulo G. Valles nga gipahinumdom sa kura paroko sa mga parokyano nga mao kini ang pinakataas nga pamaagi sa pag-ampo.