Mga anak kitang tanan sa Diyos

Niadtong miaging tuig, natapos ang pagbisita sa atong Santo Papa sa Pista sa Santo Nino, didto sa Luneta nga giapilan sa kapin sa 6 ka milyon ka mga tawo. Sa iyang Omiliya, iya kitang gipahinumduman sa misyon sa mga Pilipino labot sa mga kabataan karon ug sa pamilya.

Iyang gigamit ang “theme song” sa iyang pagbisita -”We are all God’s children”. Kini ang iyang unang gitagaan og pagtagad. Mao kini ang atong hiniusang kinaiya — mga ANAK sa Diyos. Ug busa, mga mangsoon sa usag-usa.

Ikaduha, iyang gipamatngon kanato nga ang mga kabataan karon anaa sa kahimtang sa peligro tungod sa mga nakadaot sa iyang kinaiya, bunga sa modernong panahon ug pamuyo. Ang mga kabataan nahaylo ug nawili sa mga butang nga lumalabay ug nagkulang sa pagpakabili sa mga butang mapuslanon. Ang ikaupat nga sugo sa Diyos wala na matagai og pagtagad — pagtahod sa ginikanan, amahan ug inahan.

Ang bata nahimugso ug natawo ug midako diha kauban sa usa ka pamilya. Apan ang pamilya karon nagapadayon nga nagakausab tungod gihapon sa daghang nakadaot kaniya subay sa mga bag-ong panghunahuna bahin sa pamilya. Ang bag-ong pamuyo, bag-ong mga pakiglambigit sa mga miembro sa pamilya – tali sa amahan ug inahan, tali sa mga anak ug ginikanan, tali sa mga managsoon. Ang pamilya gikinahanglan nga protektahan sa mga nakadaot sa kamatuoran, kabalaan ug kahalangdon niya. Susama nga panalipod ang gikinahanglan sa pamilya sa Simbahan, sa pamilya sa nasud. Ang pamilya kinahanglan nga maulian sa iyang sakto nga dignidad ug katuyuan.

Sama sa Sagrada Pamilya sa Nasaret, gitagaan sa pagtagad ni Papa Francisco si San Jose nga maoy tigpanalipod ug tigdumala sa maong pamilya. Iyang gitanyag pag-usab si San Jose nga himoong dakong bahin sa panaw sa mga kabataan ug sa pamilya karon.

Ang napupo nato gikan sa iyang mensahe mao nga kitang mga Pilipino nga dunay dakong pagtagad ug pagdebosyon sa Santo Nino kinahanglan nga motabok gikan sa debosyon ngadto sa misyon. Dayg kaayo ug bilihon ang atong debosyon. Apan dili pa kini igo kay dili ma kini makabag-o sa kinabuhi sa tawo. Ang misyon mao ang pag-amoma pagayo sa mga kabataan ug kabatanonan, pagpanalipod sa pamilya, ug iapil si San Jose sa iyang panaw.

Niining Hubileyo sa Kalooy, ipadayag nato ug ipadangat ang maong kalooy ngadto sa mga kabataan ug kabatan-onan. Sa pagapil sa pagsimba, giyahan ug tultolan sila sa saktong paagi. Sa panahon sa ilang kalibog, kasaypanan, kamasupilon, pasensyahan ug kuyugan gihapon sila. Sa panahon sa ilang kahuyang ug pagkahisalaag, lig-onon ug dumalahan sila pag-ayo. Sa panahon nga nagsakit ug nakrisis sila, higugmaon ug tambalan ang lawas ug kalag.