Lideres sa GKK lig-onon sa Social Communications Commission sa Arkidayosis

Gilusad na ang kampanya alang sa pagpalig-on sa mga kalihim sa Gagmay’ng Kristohanong Katilingban (GKK) nga karon gitawag na ug mga Social Communication Committees (SOCCom) sa Commission on Social Communications sa Arkidayosis sa Davao.

Unang gibisita sa SOCCOM Team nga gipanguluhan ni Fr. Ritsche J. Gamaya, DCD ang mga Pangulo sa Katilingban (PSK) sa Parokya sa Toril ug gisundan sa mga Pangulo sa Alagad (PSA) sa gitawag nga kampanya nga Ronda Parokya.

Katuyuan sa maong kampanya mao ang pagpasabot sa misyon sa matag usa ka binunyagan dinha sa Dekrito sa Social Communications nga gipagawas niadto pang tuig 1965 sa Vatican.

Mao usab kini ang tubag sa hagit nga gipasibaw sa Santo Papa nga kinahanglan ipakaylap ang Maayong Balita ngadto sa mga hilit nga dapit kon ang gitawag nga mga “peripheries.”

Gitakdang himamaton usab ang uban pang mga lideres sa GKK atol sa ilang tagsa-tagsa ka mga panagtigom sa parokya.

Ang kampanya naglangkob sa pagpasabot sa mga kabag-ohan sa Davao Catholic Herald ug ang paga-ablihan nga radio, DXGN 89.9 Spirit FM nga karon nagsugod na sa test broadcast.