Kapin 200 ka mga Gradwado sa Skills Training andam na sa panginabuhian

Kapin sa 200 ka mga benepisyaryo sa skills training ang andam na sa panginabuhian.

Pormal nga migradwar ang 222 ka mga gibansay sa Technical Education Skills Development Authority (TESDA) ug gipahigayon sa mga nagkalain-laing parokya sa Dabaw alang sa milabay’ng Tuig sa mga Kabus nga gisaulog sa Simbahan.

Gisaksihan kini sa kapin 2000 ka mga delegado gikan sa 38 ka parokya sa Artsidyosesis sa Dabaw ang nagtapok alang sa tinuig nga Parish Social Action Ministry (PSAM) General Assembly, Enero 9 sa St. Francis Xavier Regional Major Seminary Gym didto sa Catalunan Grande.

Tumong sa maong panagtigom nga tapukon ang mga miyembro sa Parish Social Action Ministry nga mao ang PSAM Coordinators, mga Pangulo sa Alagad (PSA) sa matag Gagmay’ng Kristohanong Katilingban (GKK) ug Service Ministry Heads ilabi na nga ginasaulog karon ang Year of Mercy.

Kahinumdoman nga nakig-alayon ang Artsidyosesis sa Dabaw ug TESDA alang sa maong skills training aron mahatagan ang mga benepesyaryo og kahanas sa pagtrabaho sa nagkalain-laing disiplina sama sa welding, motorcycle repair, electrical installation and repair, refrigeration and air-conditioning repair, cellphone repair, farming, food processing ug uban pa.

Kauban usab sa maong skills training ang Department of Labor and Employment (DOLE) nga naghatag og starter kits alang sa mulampos sa maong training.

Kabahin sa whole day PSAM General Assembly ang input mahitungod sa GKK Social Action Committee (GSAC) aron matanom ang liso sa social action sa istruktura sa GKK sa simbahan ug ang tibuok assembliya naka-sentro sa tema nga: “Kristohanong Pag-alagad sa Kalooy sa Ginoo Nagsumikad ug sa Eukaristiya Molungtad.” (ASAC Davao | DCHerald)