Fluvial Parade sa Sr. Santo Niño Parish, Kaputian

Mabulukon ug malampuson nga gisaulog sa Parokya sa Sr. Sto Niño ang ika-33rd Parochial Fiesta diin aduna kiniy tema nga gikuha sa usa ka berso sa bibliya Mk.10:15 nga nagkanayon: “Timan-i ninyo kini: ang dili modawat sa paghari sa Dios sama sa usa ka bata, dili mahisakop niini”. Ang maong kapistahan gisaulog sa tibuok Poblacion, Kaputian District kaniadtong Enero 17 niining tuiga 2016.

Sa wala pa man miabot ang kapistahan, adunay mga nagkadaiyang espirituhanong preparasyon ang gipahigayon sa parokya isip sakripisyo ug agig pasalamat ngadto sa Batang Hesus nga maoy nagdala ug kahayag sa kinabuhi sa matag usa nganhi sa kalibutan. Usa na niini mao ang pilgrimage sa imahen ni Sr. Sto. Nino ngadto sa matag distrito nga sakop sa Kaputian nga adunay misa. Kini pamaagi sa pagsangyaw, pagpalawom, pagpalig-on sa pagtoo ug pagpasalamat sa batang Hesus nga si Sr. Sto Nino.

Aduna usab Fluvial parade nga gipahigayon sa bisperas diin giawhag ug gilauman ang kadaghanan nga mga parokyano uban ang ilang imahen sa ilang patron sa ilang GKK o panimalay nga muapil sa maong parada sa dagat sakay sa mga lantsa o transportasyon nga pandagat. Kini gilibot sa Distrito sa Kaputian. Paghuman sa maong parada, giprosesyon ang batang Hesus padulong sa simbahan diin sulod sa misa gibendisyunan ang mga imahen nga gidala sa mga parokyano.

Gisugdan sa tulo ka mga nagsunod nga misa ang pag-abot sa adlaw sa kapistahan sa Batang Hesus diin ang ikatulong misa nga nagsugod sa alas 10 sa buntag, gisaulog ug gipanguluhan ni Arsobispo Romulo G. Valles, DD. Malipayon si Arsobispo Valles sa kadaghan nga mipakita gayod sa ilang lawom ug hingpit nga pagdebosyon kay Sr. Sto. Nino pinaagi sa pagsimba ug pakiglambigit sa ilang kaugalingon sa nagkadaiyang espirituhanong preparasyon sa pag-abot sa kapistan sa Batang hesus. Gipasabot usab ni Arsobispo ang papel sa batang Hesus sa kinabuhi sa matag usa. (Merry Love Asoy)