“Exercise”

Piyesta ni Santo Niño
Is. 9:1-6/ Ps. 97:1-6/ Eph. 1:3-6,15-18/ Lk. 2:41-52

Ang kapistahan ni Sr. Sto. Niño, ang batang Hesus, nagtudlo kanto nga motubo kita sa lawas ug kinaadman. Matud pa sa Ebanghelyo, “Ug mitubo si Hesus sa lawas ug sa kinaadman ug gikahimut-an siya sa Dios ug sa mga tawo.” Motubo kita sa atong pagkatawo ug sa pagtuo aron kahimut-an kita sa Ginoo. Sa unsang pamaagi?

Una: Ang Pagkamakanunayon sa Kristohanong Tradisyon. Si Maria ug Jose nangadto sa Jerusalem aron sa pag-apil sa Pangilin sa Pagsaylo. Kini ilang ginahimo sumala sa ilang naandan isip mga Hudiyo. Isip Kristohanon, gitawag kita sa pagkamakanunayon sa mga Sagrado nga Tradisyon ug sa pagpadayon sa mga relihiyosong tradisyon. Si Maria ug Jose misulod sa Templo sa Jerusalem aron sa pag-ampo. Niining Extraordinay Jubilee of Mercy, giawhag usab kita nga mosulod sa “templo” (sa atong simbahan) agi sa “Holy Door” aron sa pag-ampo.

Ikaduha: Ang Pagpakiglambigit sa Kristohanong Katilingban. Si Maria ug Jose nangadto sa Jerusalem uban sa katilingba’ng matoohon. Molambigit kita sa Kristohanong katilingban, nga mao ang simbahan, aron katabangan kita sa pagtubo sa pagtoo ilabina sa mga hiniusang pag-ampo. Kabahin niini ang atong pagpakiglambigit sa atong Gagmay’ng Kristohanong Katilingban (GKK) o pag-apil sa mga prayer groups. Kini magsugod diha sa pag-ampo sa pamilya. Modelo niini ang maampoong pamilya ni Jose, Maria ug Hesus.

Ikatulo: Ang Pagpangita sa Dios diha sa Balay Ampo-anan (Ang Simbahan). Ang batang Jesus nakit-an ni Maria ug Jose sulod sa Templo. Pangitaon ta ang presensiya sa Dios diha sa simbahan (balay-ampoanan).

Si Hesus mitubo sa lawas ug espiritu ug gikahimut-an siya sa Dios. Nagmakanunayon siya sa Dios Amahan. Milambigit siya sa mato-ohong katilingban. Didto siya sa balay-alampoanan (templo) ug nanudlo sa katawhan. Tinguhaon ta nga mihisama ni Hesus.

Midako ba imong lawas tungod sa daghang mga kaon sa pasko? Nan, pag-“ehersisyo”! Kinahanglan nato ang “physical exercise” aron maayo ang lawas. Labaw sa tanan, kinahanglan pud nato ang pag-ampo (“spiritual exercise”) aron maayo ang kalag. Daghang paagi sa “exercise”, naay “zumba”, naay simba!