Diocesan Bible Week Celebration

Niadtong Enero 9, 2016, ang Diocese sa Mati nagsaulog sa anticipated Diocesan Bible Sunday Celebration. Ang Tema mao: ang PULONG SA DIOS: ISIP PAGLAUM ALANG SA PAMILYA ug KUSOG SA NASUD (God’s Word: Hope for the Family, Strength of the Nation). Bisan dili maayo ang panahon ug adunay ulan, daghan (130) gihapon ang niapil sa maong selebrasyon ug kini giapilan sa mga representante gikan sa lain-laing parokya. Gisugdan ang maong kasaulogan sa Bible Enthronement.

Pagkatapos gipalauman ni Diocesan Bible Apostolate Director Fr. Nestor B. Morata, ang unod sa tema. Iyang gipahinumduman ang tanan nga ang Simbahan sa Pilipinas nagpili niining tuiga isip Tuig sa Pamilya ug Tuig sa Eyukaristiya. Kini mao ang ika-upat nga tuig alang sa pagpangandam sa Great Jubilee of 2021 ug ang kinatibuk-ang Simbahan sa pagpanguna ni Papa Francisco nagtimaan usab ning tuiga isip Jubilee Year of Mercy nga nagsugod niadtong December 8, 2015.

Gihagit ni Fr. Morata ang mga pamilya, nga gilangkoban sa amahan, inahan, ug mga anak nga mahimong disipulo ug suod nga higala sa Eyukaristiya. Iyang gidasig ang matag panimalay nga mahimong dapit diin ang mga anak makadawat sa pagtoo, sa pagmahal ug sa Kristohanong hiyas ug paghigugma sa Pulong sa Dios, pinaagi usab sa makanunayong pagbasa sa Pulong sa Dios sa matag mieymbro sa pamilya. Matud pa sa pari, anaay pamilya nga walay Bibliya, ang uban adunay Biblia apan wala kini gibasa, gibutang lamang sa altar. Mao nga gibalik-balik gyod ni Fr. Nestor nga ang mga ginikanan adunay dakong obligasyon sa pagtudlo sa ilang mga anak, kay sila man ang unang mga Katekista ug ang labing suod nga makatudlo sa gugma sa Dios sa ilang mga anak. Gani, sila ang unang panag-ingnan sa pagmahal sa Pulong sa Dios, ang Biblia. Sa laing bahin, gibatbat usab ni Fr. Nestor ang mga bahin ug kahiusahan sa mga managlahing libro sa Karaan ug Bag-ong Tugon—ang Buhing Pulong nga nagpakatawo, ug naghatag sa iyang Lawas ug Dugo kanato sa Eyukaristiya. Angayan lamang usab nga misunod sa pakigpulong ang kasaulogan sa Stos. nga Misa mga gipangunahan ni Apostolic Administrator Fr. Edito S. Bano.

Sa hapon, mao ang Workshop nga gi-facilitate ni Francis Cormanes. Gigrupo ang mga partisipante ug gihatagan ug tulo ka pangutana nga ilang pamalandongan, ug unya ipa-ambit sa tanan ang ilang mga tubag. Ug misunod dayon ang Family Bible Encounter! Ang tanan excited, labi na gyod ang pamilya nga nag-representar sa ilang parokya. Gidumala ang maong Family Bible Encounter ni Diocesan BA Coordinator Sr. Belen R. Suemith, LGC isip quiz-master ug over-all chairman sa maong kalihokan. Gipaila-ila usab ang duha ka judges nga mao sila Sr. Marietta H. Alo, OND ug Sr. Jacqueline Caligner, CM. Kining Family Bible Encounter giapilan sa 6 ka mga pamilya. Ug ang nigawas nga mananaog mao ang mga mosunod:

1st Place: San Vicente Ferrer Parish, Lupon — Juario Family (Larry, Diza ug Christian);
2nd Place: Sacred Heart of Jesus Parish, Don Bosco, Dahican — Moreno Family (Ernesto, Roselyn, Roniel, ug Emiel);
3rd Place: San Isidro Labrador Parish, Banay-banay — Barete Family (Bibiano Sr., Victoria, Bibiano Jr., ug James);
Consolation Prizes:
a. San Nicolas de Tolentino Cathedral, Mati — Padullon Family (Efren Sr., Enemecia ug Efren Jr.);
b. Divine Mercy Shrine Parish, Madang – Apares Family (Ronelio, Lonesa, Rino, ug Nica);
c. San Ignacio de Loyola Parish, Luzon — Calinawan Family (Dario, Rosenda, Darsen John).