Ang tinuod nga pag-ila tinukmod sa gugma

Ikaupat nga Domingo sa Ordinaryong Panahon
Jer. 1:4-5, 17-19/ Ps. 71/ 1 Cor. 12:31-13:13/ Lk. 4:21-30

Usahay, ang bata mas maminaw pa sa maestra kaysa iyang ginikanan. Usahay, ang bana mas maminaw pa sa kumpare kaysa iyang asawa; ang asawa mas maminaw pa sa kumare kaysa iyang bana; ang igsuon usahay mas maminaw pa sa barkada kaysa iya mismong igsuon. Nganu kaha?

Kini tungod kay kadtong mas nakaila kanato ug mas nailhan nato mas makasulti man sa tinuod bahin kanato. Ug sila nga makasulti sa tinuod bahin kanato, usahay dili nato madawat ang kamatuoran bahin kanato, kay tinuod man. Ug ang tinuod kasagaran sakit nga dawaton.

Kini ang nahitabo kang Hesus sa iyang kaugalingong lungsod. Nakaila Siya sa katawhan ug nasayod Siya sa ilang mga batasan ug panginahanglan sa kaluwasan. Siya usab nailhan sa kadaghanan. Ang Iyang mga buhat nagpatin-aw man sa kamatuoran, mao nga Siya lisud nilang tuohan ug dawaton kay sakit man sa ilang atubangang ang pagdawat sa riyalidad. Alang kanila, Siya anak lamang sa usa ka panday. Tinukmod sa tawhanong kahuyang, wala Sila makadawat sa kamatuoran.

Apan ang Dios, diha sa unang pagbasa, nga nakaila kaayo kanato sukad pa sa atong pagpanamkon sulod sa tiyan sa atong inahan, midawat ug misalig kanato. Ang Dios nga nakaila kaayo kanato bisan sa atong mga kahuyang, misalig nga adunay kaayo dinhi kanato. Kanunay Siyang nag-lig-on kanato batok sa mga dautan aron mahimong instrumento sa kaluwasan ngadto sa uban.

Kung adunay gugma, matud pa sa ikaduhang pagbasa, dili imposible ang tanan. Gugma maoy magtukmod nga makita ang kaayo taliwala sa dautan. Ang gugma nga puno sa pasensiya, dili masina, dugay masuko, maminaw ug andam mopasaylo, madawaton sa isigkaingon, malaumon ug malahutayon.

Andam ba kita nga modawat sa mga komentaryo sa mga nakaila kanato? Abli ba kitang maminaw sa tambag sa miyembro sa atong pamilya? Misalig ba kita sa gisulti ug gibuhat niadtong nailhan kaayo nato?

Ang tinuod nga pag-ila sa isigkatawo, tinukmod sa tiunay nga gugma. Ang gugma magdala sa kaayohan ug kaluwasan sa kalag.