Ang Pagtuon sa Pagtoo

Niining ikatulong Dominggo sa Ordinaryong Panahon sa atong Liturhiya, aduna kitay duha lamang ka puntos sa atong pamalandong, binasi sa atong Ebanghelyo.

Una: Ang kamahinungdanon sa atong pagtuon bahin sa atong pagtoo. Diha sa atong Ebanghelyo, si San Lukas miingon: “Tungod kay NAKATUON man ako pag-ayo niining… aron masayod ba sa TIBUOK nga KAMATUORAN sa mga butang nga gitudlo kanilo.” Importante gayod diay ang pagtuon aron kita masayod sa Kamatuoran mahitungod sa atong pagtoo. Kun kita masayod ug makasabot sa makatuoran sa atong pagtoo nasiguro ako nga mamahimo kitang aktibo ug madasigong miembro sa atong simbahan/katilingan/GKK.

Dili usab unya kita madani o madala sa ubang relihiyon o sekta. Ug labaw sa tanan ato unyang mapuy-an ug madipensahan ang atong PAGTOONG KATOLIKO ug ang atong SIMBAHANG KATOLIKO.

Ika-Duha: Asa man kita angayang moadto aron pagtuon bahin sa atong pagtoo? Ang Ebanghelyo nag-ingon: “Nagtudlo Siya sulod sa ilang mga sinagoga… ug sa mga naandan niadto Siya sa sinagoga sa adlaw nga Igpapahulay.”

Adunay panultihon sa English: “right time at the right place” o “right place at the right time.” Sa Bisaya pa, “anaa sa ensaktong takna sa insaktong lugar; sa insaktong lugar sa insaktong takna.” Base sa Ebanghelyo ang insaktong lugar mao ang Simbahan o kapelya ug ang insaktong takna o panahon mao ang Adlaw nga Igpapahulay/adlaw nga Dominggo. Ang adlawng Dominggo dili laba-“day”; dili plantsa-“day” labaw ug dili “ordinary working day.” Ang Adlawng Dominggo usa kini ka “HOLY-DAY = BALAANG ADLAW; kana ang Dominggo,” “THE LORD’S DAY” = ADLAW KINI SA GINOO ADLAW ALANG SA GINOO.

Busa kung gusto kita nga makakat-on sa kamatuoran sa atong pagtoo kinahanglan moadto kita sa atong tagsatagsa ka kapilya panahon sa Santos nga Misa sa Adlaw nga Dominggo, tungod kay atong madungog si Kristo nga nanudlo diha sa mga pagbasa sa Homiliya ug sa pamalandong nga ginabasa sa mga Pangulo sa Liturhiya (PSL).