Ang Kapistahan ni Sr. Sto. Niño!

Usa sa mga inila nga kapistahan nga atong ginasaulog dinhi sa Pilipinas, mao ang kapistahan sa STO. NIÑO, diin minilyon ka mga kaigsonan nato nga adunay lalom nga debosyon niini, gani usa kini ka popular nga selebrasyon natong mga Filipino ug sumala pa sa mga nagtoon sa atong kultura ang pagtamod sa Sto. Nino usa sa mga timailhan nga kita lumad nga Filipino gayud, ug ang mga imahen niini sagad nato kining makita sa matag-panimalay bisan pa gani sa mga dagkong mga establisemento. Busa mas maayo gayud nga atong hatagan ug lalom nga pagtoon kining maong selebrasyon, kay subo lamang pamalandongon nga usahay dili nato ikalimod nga adunay pipila ka mga deboto nga wala nila mahisubay ang sakto gayud nga kahulogan sa maong selebrasyon ug daghan ang mga nahimong panatiko niini, ang buot namong ipasabot kadtong pipila nga mga tawo nga nakisabay sa maong kasaulogan apan kadtong mga pa-bwenas lamang sa kinabuhi ang ginahuna-huna dili ang pinaka-uyokan gayud nga mao ang pagbalaan, pagtahud ug pagsimba nato sa BATANG HESUS, dili dautan nga kita mangayo ug kaayohan sa atong kinabuhi, ug dili nato hikalimtan nga adunay mensahe niini mao ang pagpamalandong nato nga ang Dios nagpakatawo ug miagi siya sa pagka-bata, nga tungod niini mahimo nato nga ehimplo ang iya usab nga pagka-bata diin walay bahid sa pagkadautan sa huna-huna, ang pagka-masinugtanon, pagka-mapaubsanon ug walay mga pagdumot ug kasuko ug mao kana ang giingon ni Ginoong Hesukristo kanato nga “mas maayo nga magpakasama kamo niining mga gagmay’ng bata kay ang gingharian sa langit ilaha…” (cf. Mateo 18: 1-6 ug Mateo 19:35).

Ato usab hisgutan ang gigkanan gayud niini nga selebrasyon ang sakto nga kahulogan ug kabililhon niini. Ang Sto. Nino o mas naila sa ngalan nga Sto. Nino de Cebu (“Holy Child of Cebu”), mao ang atong pag-ila, pagtahud sa Batang Hesus. Usa kini siya ka solemnidad paghandom sa pagkabata sa atong Ginoo. Ug usa kini sa pinaka-karaan nga debosyon dinhi sa Pilipinas, gani usa usab kini nga nakahatag ug nindot nga kasaysayan sa pagka-diskubre sa Pilipinas. Niadtong Abril 14, 1521 diin si Ferdinand Magellan mihatag ug larawan sa Sto. Nino ngadto kang Rayna Juana isip gasa niya sa dihang siya gibunyagan. Ug milabay ang kwarentay-kwatro ka tuig niadtong April 27, 1565 sa dihang miabot si Miguel Lopez de Legaspi ug Fr. Andres de Urdaneta (diin sila ang hinungdan nga nahimong Kristiyanos ang mga Cebuanos), ug sa ilang paghiabot didto nakita ni Legaspi ang karaang lugar diin didto nahimutang ug gihatag ni Magellan ang larawan sa Sto. Nino.

Apan lahi na kini kay aduany dakong trahedya ang nahitabo sa maong lugar, nasunog kini ug nanga-guba na ang mga kabalayan ug komunidad, ug usa sa mga sundalo nga ilang kuyog nga mao si Juan Camus nakaplagan niya ang larawan sa Sto. Nino sa usa ka nasunog nga balay diin ang maong larawan wala gayud matatsahi o masunog bisan gamay anaa gihapon siya sa iyang nindot nga panagway. Ug mao kadto ang hinungdan diin nagsugod ang pagkuyanap sa maong debosyon sa Sto. Nino sugod sa mga Cebuanos ug nahimo nga ilang Patron tungod sa maong dakong milagro. Ug karon sa presenti nga panahon ang milagrosong larawan sa Sto. Nino gipahimutang sa Konbento sa Parokya ug ang replika niini gidayan-dayanan sa mga mahalon nga bulawan ug nindot nga sapot ug gibutang sa usa ka balay-balay nga samin ug kini gibutang sa kilid sa Altar sulod sa Basilica Minor del Santo Niño sa Cebu. Ug sukad sa una hangtud karon nilibo ka mga deboto ang nagaduaw niini matag-adlaw sa maong Simbahan diin siya gipahimutang. Ug dili gayud nato ikalimod tungod sa maong debosyon daghang mga masakiton nanga-ayo, daghang tawo ang nausab sa ilang kaugalingon ug daghan ang nagrasyan tungod sa paghatag niini nga debosyon, ug kini husto gayud ug dili kini tinumo-tumo lamang kay makita gayud nato ang iyang mga milagrosong lihuk kay tungod dili kini usa ka simpleng debosyon lamang kondili usa kini ka maayong hiyas nga paghatag ug sakto nga debosyon kay dili simpleng tawo o bata ang atong gipahinungdan niini kondili ang magbubuhat gayud sa kalibutan ang tinubdan sa tanang grasya, ang Dios nga nagpakatawo ug nagpakamatay tungod ug alang kanato nga mao ang ikaduhang Persona sa Santisima Trinidad nga mao si Ginong Hesukristo, dili dautan nga hatagan nato ug debosyon ang iyang pagka-bata kay tinuod man nga miagi gayud siya niana sa iyang pagka-tawo, sanglit siya Dios man busa angay usab nga atong handomon ang iyang pagka-bata, isip modelo sa pagkamapaubsanon.