170 gikompirmahan sa Kaputian

ANG Sakramento sa Kumpirma mao ang ikaupat nga sakramento nga angay dawaton isip mga anak ug sumusunod sa Diyos. Tungod sa maong sakramento mas mapalawom ug mapalig-on pa gayod ang atong relasyon ngadto sa Diyos isip iyang disipulo.

Kapin 170 ka mga indibidwal ang malipayong nakadawat sa sakramento sa kumpirma nga gisaulog ni Arsobispo Rumolo G. Valles didto sa Sto. Niño Parish, Kaputian, niadtong imaging bulan.

Gikan sa Gagmay’ng Kristohanong Katilingban (GKK) nga sakop sa maong parokya, ang mga gikumpirmahan gipanguluhan sa mga katekista sa matag GKK aron mapahapsay ug mahan-ay ang maong sagrado nga seremonya.

Gipasabot ni Arsobispo Valles sa iyang homilya ang importansiya sa sakramento diha sa kinabuhi sa tao isip mga Kristiyanos. Matod pa niya nga ang pagkumpirma mao ang pagpalawom sa atong pagka-anak sa Diyos nga nagatawag kanato nga mamahimong buhing saksi niya ngadto sa uban. Dugang pa ni Arsobispo nga ang kumpirma mao ang paglig-on sa atong pagka-anak sa Diyos sukad niadtong panahon nga kita midawat sa Sakramento sa bunyag.

Malipayon ug mapasalamaton ang kura paroko nga si Rev. Fr. Rico Enriquez, tungod daghan ang nangahas nga makadawat sa sakramento sa kumpirma isip ang-ang aron mas mapaduol pa sa Ginoo.