PSK gathering nagmalampuson

Sa pag-abli sa Tuig sa Kaluoy o Jubilee of Mercy, gipahigayon ang panagtigum sa tanang Pangulo sa Katilingban (PSK) sa Arkidayosis sa Dabaw didto sa Ateneo de Davao University, Martinez Sports Complex Matina, Davao City, Disyembre 12, 2015.

Gipangunahan sa Pastoral Office ug komisyon sa GKK sa Arkidayosis sa Davao, tinguha sa maong tigum nga ang mga partisipante makapadayag sa pagsabot ug pagdayeg sa Pundok Banay ug makasinati sa diwa sa kahiusahan ug pagkamisyonaryo sa lokal nga Simbahan sa Davao.

Matud pa sa Archdiocesan GKK Director nga si Fr. Pete Lamata, gipatambong usab ang mga GKK Secretaries ug Treasurers aron matuki ang tema: “Pundok Banay: Konkretong pagpadayag sa GKK isip kabahin sa lokal nga simbahan sa Dabaw.”

Dungag pa ni Fr. Lamata, “The Word of God is utmost importance in the life of cluster of families”, diin ang matag pamilya magkatigum aron sa pagpaminaw sa pulong sa Ginoo nga maoy sentro sa pagtapok.

Sa maong tigum, gipasabot sa mamumulong nga si Fr. Leonardo Dublan, Assistant Pastoral Director ug Director sa Archdiocesan Social Action Center (ASAC), ang mga kaayohan nga maangkon kon kita mag Pundok Banay. Misunod ang Buss Session o Triad sa wala pa gisumada ang mga panag-ambitay sa kasinatian.

Sa Misa nga gipangulohan ni Arsobispo sa Davao Romulo G. Valles, D.D, gipasidunggan ug gihagit niya ang mga layko diha sa ilang importanteng papel sa paglig-on ug paglambo sa GKK isip kabahin sa lokal nga Simbahan sa Davao.

Nalingaw ug nakakat-on ang tanan sa gihimong group dynamics nga may kalabutan sa Pamilya, Laudato Si ug, Tuig sa Kaluoy.