Parokya nagpahigayon ug kinaunhang Eucharistic Procession

Gisugdan sa alas kwatro sa kaadlawon, ang mga parokyano sa San Miguel, Matanao miapil sa Eucharistic Procession di pa lamang madugay. Gilibot ang 7 ka mga sona, gibiyahe ang 25 kilometro, ug kapin 900 ka mga parokyano ni Sr. San Miguel Arkanghel, sa Matanao Davao del Sur ang miduyog.

Pagkanaog sa Matanao Municipal Hall, sila nagbaktas hangtud sa Simbahan. Human maambitan ang grasyang pagkaon nga giandam, misunod dayon ang Santos nga Misa kauban ang mensahe sa kura paroko nga si Rev. Fr. Antonio C. Sila.

Dako ang pasalamat ni Fr. Sila ngadto sa mga apostolado ug sa mga lideres ug miyembro sa mga GKKs sa mainitong pagkuyog sa maong prusisyon. Iya usab gipaabot ang dakong pasalamat ngadto sa 39 ka mga GKKs nga naagian sa maong selebrasyon tungod kay nangandam usab sila sa pag-agi sa prosesyon pinaagi sa pagpasiga sa ilang mga sulo nga gibutang daplin sa kalsada, samtang nagbagting sa ilang mga kampana sa kapilya.

Kini ang pinakauna ug pinakadako nga Eucharistic Procession sa parokya. Panghinaut sa kura paroko nga ang maong selebrasyon pagadumdumon na gayud kada tuig. (Kieth Albarando | Matanao)