Pangandam nga malipayon sa pag-abot sa Manluluwas

Ikaduhang Domingo sa Adbiyento
Bar. 1:5-9/Ps. 126/Phil. 1:4-6, 8-11/Lk. 3:1-6

Ang panahon sa Adbiyento, panahon sa malipayong pagpangandam sa pagpaabot sa Manluluwas. Niining ikaduhang Domingo sa Adbiyento, ipunting nato ang atong pamalandong sa malipayong pagpangandam sa pag-abot sa Ginoo diha sa personalidad ni Juan nga Magbubunyag. Siya malipayong nangandam diha sa tulo ka paagi.

Una, ang iyang bisti hinimo sa balhibo sa kamelyo ug panit ang iyang bakus. Kining mga bistiha nagsimbolo sa pagbag-o nga dala sa paghinulsol. Dili kasarangan ang pagsul-ob niining mga bistiha. Sa samang paagi, ang atong pagbag-o ato untang mapakita diha sa kalipay sa Dios ug dili pagbangotan. Ikupo nato ang katarong sa Dios diha sa atong buhat. Mobangon kita aron magmaalagaron. Mosanag unta kita sa kabalaan. Pagbag-o sa kaugalingon ug batasan mao untay atong himuon ug dili lamang ang bag-ong sinina, bag-ong gamit ug bag-ong mga butang.

Ikaduha, ang iyang pagkaon dulon ug dugos. Kini simbolo sa kayano ug kasimple. Kontento na siya sa unsay anaa kaniya ug wala na mangandoy ug lain pa. Sa samang paagi kita usab unta magpuyo nga simple ug yano. Makontento unta kita sa unsay anaa kanato. Kini atong mapakita diha diha sa pagtabang sa mga buluhaton sa ebanghelyo, sa maayong buhat, paghatag og bili kang Kristo ug paningkamot nga mahisama unta Kaniya. Kayano sa pamuyo mao untay atong ipalabi ug dili ang mahalon nga mga palaliton. Kasimple nga mga kan-anan ug pagkaon mao untay atong panganduyon ug dili sosyal ug mahalon nga party o tigum.

Ug ikatulo, ang iyang mensahe sa paghapsay sa agianan, pagpatag sa mga bukid, pag-abuno sa mga walog ug paghapsay sa mga libaong. Kining mensahe, mensahe sa maayong relasyon sa Dios ug sa tawo nga dala sa pag-abot sa Manluluwas. Sa samang paagi, ayuhon unta nato ang mga relasyon sa isigkatawo nga nangagusbat tungod sa garbo, pagdumot ug kahakog. Sama ni San Juan magmapaubsanon unta kita sa usa’g usa aron motunhay ang hapsay nga relasyon. Ang hapsay nga relasyon magdala unta kanato sa tinuod nga kalipay sa pagpangandam sa pag-abot sa Manluluwas.