‘Panaghiusa sa Kamatuoran ang Tukmod sa Kalipay sa Diyos’

‘Panaghiusa sa Kamatuoran ang Tukmod sa Kalipay sa Diyos’

Mga pulong nga gikalakbit ni Obispo Emerito Patricio H. Alo sa iyang pagwali atol sa iyang adlaw’ng natawhan niadtong Disyembre 2, 2015. Sa iyang pagsaulog sa Santos nga Misa sa pasalamat sa iyang 76th birthday sa Divine Mercy Shrine and Parish kauban ang kaparian gikan sa managlahing mga parokya, human sa mañanita alas 5:00 sa kaadlawon, giduot niya ang iyang dakong pagpasalamat sa tanan nga nahimong kabahin sa iyang kinabuhi ug pag-alagad sukad sa pagsugod sa diyosesis sa Mati, ug gipahinumduman niya ang tanan nga magpakamatuod sa ilang pagbansay sa pagtuong Katoliko, ug gani magmadasigon gayud sa pagsangyaw sa maayong balita sa kamatuoran ni Kristo sa kinatumyan sa kalibutan. Matud pa ni Bishop Pat, mao usab kini ang ‘tinukmod sa kalipay sa Diyos nga maghatud sa matuod nga kalipay sa tanan nga nangita sa kamatuoran ug kaluwasan gikan sa mga panghitabong kagubot karon.’ Diwa sa kalipay diha sa pagpaambit ang mahulagway sa pagsaulog sa adlawng natawhan sa Obispo. Tradisyunal nga giandam ang paniudto alang sa liboan nga mga kabus ug yanong katawhan nga miduong sa St. Therese Gym sa Clergy House Compound, ingon man ang paghatud og pagkaon sa mga piniriso sa Provincial Rehabilitation Center. Si Bishop Pat ang miluwat og panalangin sa mga pagkaon, ug nakiglamano o nag-bless niadtong miduol kaniya. Samtang mga pinasidunggang dinapit sa panggamhanang probinsyal ug lokal, ingon man sa natad sibiko, legal ug militar, ang mga igsuon sa Obispo, ug ang kaparian, kamadrihan, ug mga laykong lideres lakip ang kabatan-onan ang nagsalo-salo sa hawanan sulod sa Clergy House. Si Obispo Wilfredo Manlapaz gikan sa diyosesis sa Tagum maoy nanguna sa panalangin sa paniudto.

Eco-Tourism sites ang bag-ong destinasyon sa Oriental

Gikalipay ug gipasigarbo sa Gobernadora sa Davao Oriental ang pagdaghan sa mga tourist arrivals sa probinsiya. Pinasubay kini sa nahipos nga impormasyon gikan sa probinsiya, pinaagi usab sa Provincial Tourism Office. Nasayran nga gikan sa 17 mil ka mga turista niadtong tuig 2011, mi-abot na karon ang tourist arrivals og 300 mil, gani giingon nga ang Davao Orintal na ang makonsidra nga bag-ong destinasyon alang sa eco-tourism sites. Na-una ng gipahayag ni Governor Corazon Malanyaon nga ang probinsiya ang nakatutok karon sa pagduso pa sa eco-tourism potentials sa Davao Oriental. Gani, nasugdan na kini pinaagi sa pag-establisar sa Aliwagwag Eco Park, Mt. Hamiguitan Eco Park, Sunrise Boulevard, ang Cateel Riverview Park, ang pag-develop sa Cape of San Agustin, ug uban pa nga nakahan-ay na karon sa plano sa Governor.