Paglipay kanunay sa Ginoo

Ikatulo nga Domingo sa Adbiyento
Zep. 3:14-18/Is. 12:2-6/Phil. 4:4-7/Lk. 3:10-18

Naa na kita sa ikatulong Dominggo sa adbiyento nga gitawag sa Gaudete Sunday o Dominggo sa kalipay. Naa pa bay kalipay ang mga tawo karon? Unsa naman kaha ang pagsabot sa mga tawo sa kahulogan sa kalipay?

Sa atong pagpamalandong sa diwa sa adbiyento nga mao ang pagpaabot sa Mesiyas daghang mga nagasulod sa atong panghunahuna labina grabe man ang kalisod ug mga pag antos sa mga tawo, tungod sa mga pamilyang nagkatibulaag tungod sa pipilang miyembro nga naa sa laing nasod aron magtrabaho alang sa panginahanglan sa pamilya.

Naa pud ang uban napuno sa mga kasamok tungod sa mga relasyon nga nagbangi tungod sa mga garbo sa usag-usa. Naa pud ang uban nag ila sa kalipay diha sa mga kalingawan sama sa mga butang nga makahatag ug kalipay sa mubong panahon.

Sa nagkaduol na ang pagpaabot sa atong Ginoong Dios, ang mga pagbasa karong Dominggo nagtudlo kanato sa tinuod nga kalipay na nagagikan sa Ginoong Dios. Ingon ni Propeta Sofonias ‘ang Ginoong Dios anaa uban kaninyo ang iyang gahom mohatag kaninyo ug kadaugan.’ Sa ato pa ang mga makapildi sa tawo mao ang lihok sa buhing Dios nga nagauban sa katawhan sa tanang panahon sa kalipay ug kalisdanan.

Si San Pablo nagaingon sa mga taga Filipos ‘paglipay kamo kanunay diha sa Ginoo’. Sa mga pag ampo sa mga panginahanglan ang Ginoong Dios muhatag sa iyang kalinaw aron manalipod sa kinabuhi. Niining higayuna magtudlo ang Dios unsaon sa pagpuyo sa kinabuhi gikan sa lihok sa Dios sa kinabuhi.

Sa Ebanghelyo ni San Lucas gipasabot ni San Juan magbubunyag na ang tinuod nga kalipay sa tawo mao ang paghimo ug angay ug matarong subay sa trabaho ug diha sa tawag sa pag alagad; dili diha sa panlupig ug pagpangilad sa isigkaingon.

Maglipay kita karon kay hapit na ang pag abot sa Manunubos nga si Hesuskristo. Sa atong kalibutan nga puno sa daghang klaseng paghunahuna ug sa mga butang sa palibot lisod masabtan na ang tinuod diay nakalipay naa diha sa relasyon nato sa usag usa sama sa gihimo sa Dios — ang pakig uban sa katawhan. Ang Dios nahimong tawo sama kanato. Sa ato pa nindot g’yud diay ang atong relasyon sa tanan. (Fr. Jose Marie Escuadro)