Mga Igsoon ko diha sa atong mga Gagmay’ng Kristohanong Katilingban (GKK)

Kalinaw!

Nagsulat na usab ako kaninyo aron pagpasalamat, pagtimbaya, pangumusta, ug magdasig sa pagduyog sa mga moabot pa natong mga paningkamot.

Una, dako ang akong pasalamat sa aktibong pagsalmot sa atong mga Pangulo sa Liturhiya (PSL) sa gipahitabo nga panagtapok sa ika-50 anyos sa Kasaulogan sa Pulong (KSP) ug PSL sa tibook Arsdiyosesis sa Dabaw. Makapadasig kaayo ang kadaghanon ug partisipasyon sa atong mga PSL.

Ikaduha, salamat usab sa lig-on ug madasigong pagduyog sa atong mga Pangulo sa Panudlo (PSP) sa gipahigayon nga mga Vicariate Gatherings alang sa mga katekista ug GKK formators. Kini napadagan sa tibook tuig sa 2015.

Ikatulo, salamat sa makalipay nga paningkamot sa atong mga Pangulo sa Alagad nga nagtoon,nangandam ug nagbansay alang sa mga nagkalain-laing matang sa kalamidad nga posibleng moabot ug mobalda unya sa atong adlaw adlaw nga pamuyo. Bunga niini, hinay-hinay na nga naporma ang atong mga GKK Social Action Committee (GSAC).

Sa kinatibuk-ang dagan karon, uban sa mga kaparian, ang atong mga GKKs sa matag parokya anaa na sa proceso sa Pagpili ug Pag-appoint sa mamahimong mga bag-o nga mga GKK Servant Leaders (GSL). Kini nga proceso giubanan sa usa ka mapadayonong pormasyon aron ang atong mga GSLs mamahimo gayod nga Servant Leader, sama ni Jesus nga ang atong modelo.

Tukma kaayo ang mga nasugdan na nga kalihukan sa matag parokya kalabot sa GKK tungod kay sa nasulti na nako sa akong unang sulat niining tuiga, nga sugod karong Nobyembre 29,2015, unang Domingo sa Adbyento, gilauman nga kita mag-implementar na sa kinatibuk-ang unod sa Guidelines and Norms on the GKK.

Kining atong kasinatian dinhi sa lokal nga Simbahan sa Dabaw, usa ka matuod nga pagsaksi sa diwa sa mga dokumento sa Vatican II nga mao ang participation, dialogue, and co-responsibility isip katilingban sa mga misyonaryong disipulo ni Kristo. Ipadayon nato ang mga maayong buhat. Makakat-on kita diha sa atong mga kalisdanan ug kalampusan.

Busa, sa atong padayon nga paglawig, nagpasalamat ako sa inyong mainitong pagsuporta sama sa PSK Gathering uban sa mga GKK Secretary ug Treasurer niadtong 12 Dec. 2015, Ateneo de Davao University, Matina, Davao City.

Sa katapusan, diha sa pagsugod sa Jubilee of Mercy (December 8, 2015), ako nanghinaut nga mapuno kamo sa grasya sa Dios ilabina niining panahon sa Adbyento ug Pasko. Giawhag ko kamo sa pagdawat sa mga sakramento, labina ang sakramento sa Pagpakig-uli ug Yukaristiya. Mosalig kita kanunay sa grasya sa Dios. Mag-inampoay kita isip usa ka Kristohanong pamilya. Pagaubanan kita kanunay sa Ginoo uban ang atong Mahal nga Inahan, Birhen Maria.

Kaninyo nag-alagad,

+ROMULO G. VALLES, D.D.
Archbishop of Davao