Maayo ug balaan nga pasko kaninyong tanan!

Karong Dominggo Disyembre 27, ginasaulog nato ang pangilin sa Sagrada Pamilya sa Nazaret. Molanog pag-usab ang awit sa mga angheles sa pagkatawo ni Jesus didto sa pasungan sa Betlehem – “Himaya sa Dios didto sa langit, ug kalinaw sa tanan dinhi sa yuta nga Iyang gikahimut-an!”

Kasagaran dili na kaayo kini natagaan og pagtagad sa Kristohanong banay ugkatilingban, ilabi na kay nahisulod siya sa panahon sa Oktaba sa Pasko. Labaw na jud karong tuiga diin naayol ang maong pangilin sa Diciembre 27, duol kaayo sa adlaw sa Pasko sa Pagkatawo. Bisan pa man niini mahimo pa natong paningkamutan nga matagaan kini og dugang pagtagad ug kahulugan sa mga adlaw nga mosunod.

Una sa tanan, palandungan nato pagusab ang kasinatian sa Sagrada Pamilya sumala sa pipila ka teksto kinutlo sa Ebanghelyo diin nahisgutan ang Sagrada Pamilya. Anaa ang Sagrada Pamilya didto sa pasungan sa Betlehem (Lk 2:16) nga nahibalag sa mga magbalantay sa karnero. Anaa usab ang pagpanaw nila sa Ehipto (Mt. 2:13-15). Ang pagdala kang Jesus didto sa Templo (Lk.2:22-29). Sa Lk. 2:46-49 mabasa nato ang pagkaplag kang Jesus didto sa Templo. Ug sa katapusan, si Jesus nagtubo didto sa Nazaret ubos sa panagama sa iyang mga ginikanan nga si Maria ug Jose.

Sa atong pagpamalandong ang usa nga dayag natong makaplagan mao nga ang Dios mipili nga mopadayag sa kaugalingon pinaagi sa pagpakatawo sa usa ka pamilya, sa ubos ug kabus nga pamilya, matoohon ug matarong, nagkahiusa ug naghigugmaay, nagmatuto sa batang Jesus. Sa ingon niini, matud pa ni Papa Benedikto XVI kaniadto, ang pamilya gihimo sa Dios nga pinadayag sa iyang pagkadios.

Sama sa ako nang gikaingon sa miaging semana, mapuslanon nga magnobena kita sa Sagrada Pamilya karong semanaha ug ipahanungdan kini sa tanang pamilya karon nga nagapadayon nga naguba sa atong modernong panahon. Akong isugyot ang mosunod:

Adlaw 1 – Diciembre 27, alang sa pagpasalamat sa tanang panalangin nga nadawat sa pamilya.
Adlaw 2 – Diciembre 28, alang sa mga nangandam sa kaminyoon.
Adlaw 3 – Diciembre 29, alang sa mga magtiayon walay kasal.
Adlaw 4 – Diciembre 30, alang sa mga pamilya nagantus sa “addiction”.
Adlaw 5 – Diciembre 31 , alang sa mga pamilya nga nag-atiman og mga tigulang.
Adlaw 6 – Enero 1, alang sa mga nagkagubot ug nagkasamok nga pamilya.
Adlaw 7 – Enero 2, alang sa mga pamilya nga dunay “special children”.
Adlaw 8 – Enero 3, alang sa Bokasyon gikan sa pamilya.
Adlaw 9 – Enero 4, alang sa mga katuyuan sa kaugalingong pamilya. Labi pang mapuslanon kon makaapil kamo sa pagsaulog sa Misa niining mga adlaw sa nobena sa Sagrada Pamilya.

Magmabungahon unta ang atong Tuig sa Pamilya ug Yukaristiya nga gipasiunahan niining Nobena sa Sagrada Pamilya. Kuyugan unta kita nila sa ilang pangama niining umaabot nga bag-ong tuig nga sa gihapon mapuno sa mga hagit ug mga hulga batok sa pamilya. Apan, magpatigbabaw kanunay ang Diosnong kalooy nga magmadaugon diha kanato.

MAAYO UG MALINAWONG BAG-ONG TUIG SA TANAN.