Jubilee of Mercy ug Immaculada Conception

Tungod kay natumong man ang kapistahan sa Immaculada Conception, Disyembre 8, atol sa pag-abli sa Jubilee of Mercy, ug tungod kay dili makahimo sa pagtambong ang atong Arsobispo sa Davao, si Msgr. Edgar Labagala mao ang nangulo sa Pontifical Mass atol sa ika-63 nga kapistahan sa parokya sa Peñaplata. Hinuon, si Yanong Muloy mao ang misaulog atol sa ika-9 nga Misa-Novena sa alas 5 sa hapon niadtong Disyembre 7.

Matud niya, “sa matag pagsaulog sa mga dagkong pista o solemnidad, ang Simbahan mobalik sa pamaagi sa kalendaryo sa Bibliya: ang ihap sa usa ka adlaw magsugod gikan sa pagsalop sa adlaw hangtud sa pagsalop sa sunod adlaw.

“Ngano man nga ang pag-abli sa Jubilee of Mercy giatol man sa Disyembre 8, ang kapistahan sa Immaculada Conception? Unsay koneksyon niining duha?”, pangutana ni Msgr. Valles.

“Ang unang tubag makita diha sa unang pagbasa. Sa basahon ni Propeta Isaias, gihulagway nga diha sa himaya sa Ginoo, ug kahalangdon ug gahum sa atong Dios, makabaton sa kahingpitan sa kinabuhi ang mga uyamot ug sila nga naglaum sa kalooy ug grasya sa Dios. “Ang gugma ug kalooy sa Ginoo malungtaron ug malukopon (all-encompassing); mao nga ayaw’g kumpyansa sa gugma ug kalooy sa Ginoo”, dugang sa Arsobispo.

Ang ikaduhang tubag anaa sa Ebanghelyo karon diin giayo ni Jesus ang usa ka paralitiko, “kitang tanan, apil ang Obispo, mga makasasala; apan ang Diyos kanunay’ng naghulat kanato nga mapaubsanong moduol Kaniya. Tungod kay dili buot ang Dios nga kita ma-impyerno. Mao nga angayan kitang maghimaya kang Maria tungod kay sa pagpanamkon kaniya nga walay sala, siya maoy pinakaunang nakadawat sa Kalooy sa Ginoo.”

Gitapos ni Arsobispo Valles ang iyang homiliya pinaagi sa pagsangpit sa panabang ni Maria, aron nga ang tanang mitambong makadangat nga putli ngadto sa iyang Anak. (Kathlyn Meñoza | Role Piyao | ICP-Peñaplata)