Hubileyo sa kalooy

“Maloloy-on sama sa Amahan”
(Lk 6:36)

Sa Deciembre 8, 2015, Solemnidad sa Immaculada Concepcion, ilunsad sa atong Santo Papa Francisco didto sa Roma ang Talagsaong Hubileyo sa Kalooy (2015-2016). Sa maong adlaw ablihan ni Papa Francisco ang Balaang Pultahan didto sa Basilika ni San Pedro — ang balaang pultahan sa kalooy ug pagbag-o.

Ang tuyo sa maong hubileyo, matud pa ni Papa Francisco mao nga una, makaplagan ug masinati pagusab sa Simbahan kining kahibulungang kinaiya sa Dios sa pagkamaloloy-on labaw sa tanan. Ikaduha, nga mapuy-an ug masangyaw sa Simbahan ngadto sa tanan, kining iyang kasinatian sa kalooy, pinaagi sa iyang pulong ug buhat. Busa ang tema — “Maloloy-on sama sa Amahan.”

Duha ka panaw ang kinahanglan natong himoon niining tuiga. Una, ang panaw sa pagtagamtan sa kalooy sa Dios alang kanatong makasasala. Ug ang ikaduha, ang panaw sa pagkinabuhi nga maloloy-on.

Gidasig niining maong tuig ang “pagpanawduaw sa pagbag-o.” Nagkinahanglan kini sa pagpanaw padulong sa Balaang Pultahan sa kalooy sa Dios ug paggakos sa kalooy. Gikan sa kahimtang sa sala ug pagpakasala mopanaw ngadto padulong sa pagsalikway sa sala ug pakiguli sa Dios. Nagkinahanglan kini ug pagpaubos ug paghinulsol sa sala. Nagkinahanglan kini sa pagpailob ug pagsalig ug paglaom sa gahom sa kalooy sa Dios nga labaw pang gamhanan kay sa bisan unsang sala.

Ang maong panawduaw ngadto sa pultahan sa kalooy nagkinahanglan sa 1. pamalandong sa kalooy sa Dios, 2. pagtabok sa pultahan, 3. pagsaulog sa Sakramento sa Pakiguli, 4. pagpahayag sa Pagtoo, ug 5. pag-ampo alang sa Santo Papa ug sa iyang mga pahanungdan alang sa Simbahan ug sa tibuok kalibutan.

Buot sa Santo Papa nga ang mga bunga sa Tuig sa Kalooy moabot sa tanan. Busa, bisan ang mga binilanggo, mga masakiton, tigulang, ug naginusara, maadtoan unta aron makahimo gihapon sila sa panawduaw bisan didto sa ilang giabutan. Gitagaan usab sa Santo Papa ang tanang Pari sa kalibutan, sulod sa Tuig sa Kalooy, nga makapasaylo sa mga nagpalaglag, (aborsyon) ug sa naglaglag, ug sa mitabang pagpalaglag sa ilang mga bata sa sabakan sa inahan.

Tagaan usab nato og pagtagad ang mga nagpaluyo ug apil sa mga sindikato sa krimen sa atong mga dapit. Awhagon nato ug tawagon natong magbag-o na sa ilang kinabuhi. Nga ilang biyaan na ang ilang kinabuhi nga nakadaot ug nakaalaot sa daghang mga tawo ilabi na sa mga babaye ug mga bata. Ang mga kurakot usab nga mga opisyales ug kawani sa gobyerno atong sangyawan sa Pulong sa Dios ug dasigon usab sa pagbag-o na ug mangalagad sa matarong nga paagi.

Sa pagtuman nato sa mga gikinahanglan sa panawduaw madawat nato ang kapasayloan sa atong mga sala. Apan gawas pa niini, ang maong kapasayloan mo “extend” pa gayud sa pagpahamtang sa “Indulhensiya” sa tibuok natong kinabuhi.

Bisan napasaylo na ang atong mga sala anaa pa nabilin ang mga epekto sa sala nga nagapaluya ug nagapugong kanato nga magpadayon sa panaw sa kaluwasan.

Busa sa atong pagduol sa Indulhensiya sa Tuig sa Kalooy, mangayo kita sa Amahan nga pasayloon ang atong mga sala ug liguan kita Niya sa iyang Indulhensiya. Sa ingon niini, magapadayon kita sa mga maayong bunga sa atong panawduaw sa kalooy.