Ganghaan sa Kalooy

Advanced Merry Krismas po!!!

Mao kini ang sagad natong madungog karon sa mga bata ug mga katutubo nga manaygon sa atbang sa atong pultahan. Hapit na man gud ang Pasko ug tinghatag na pud ug regalo. Ang pangutana, ginaablihan ba nato ang atong pultahan aron mohatag ug pinaskuhan? Gibati ba kita ug kalooy sa mga tawong nanginahanglan sa atong tabang?

“Kini mao ang ganghaan sa Ginoo; mosulod ako ug mangaliyupo sa Iyang kalooy.” (This is the door of the Lord; I will enter and pray for His mercy.) Mao kini ang makahuloganon nga kanta sa koro didto sa Vatican samtang nagbarog si Papa Francis atubangan sa Holy Door of Mercy kaniadtong Disyembre 8, 2015.

Atol kini sa paglunsad sa Jubilee of Mercy. Si Papa Francisco nag-inusarang mibarug atubangan sa Diyos aron mangayo sa Iyang kalooy alang sa katawhan. Unya iyang giablihan ang pultahan ug misulod siyang nag-inusara gihapon. Miduol ang Santo Papa sa “Altar of Confession” ug nag-ampo na usab.

Ang awit sa koro, ang pag-abli sa Holy Door ug ang pagsulod ni Pope Francis nga nag-inusara adunay lawom kaayo nga kahulugan nga angay pamalandongan. Unsa kini ug ngano? Karong panahona, importante pa ba ang kalooy sa Ginoo? Si Kristo miingon kang Santa Faustina, “Ang kalibutan dili makabaton ug kalinaw kung dili kini modangop sa Akong Kalooy.” Asa man makit-an ang pultahan sa kalooy sa Ginoo? Una, anaa kini diha sa Sakramento sa Pagpakig-uli sa Ginoo pinaagi sa pagkumpisal sa atong mga sala ngadto sa pari. Kanus-a pa ba ang imong ulahing kumpisal? Sama sa basurahan nga puno na kaayo, bug-at na ang paminaw sa atong kalag tungod sa kadaghan sa sala.

Ayaw kahadlok sa pagkumpisal kay si Kristo anaa naghulat kanimo. Abli ba ang pultahan sa imong kasingkasing nga malooy sa uban: pakaona ang gigutom, paimna ang giuhaw, hatagi ug bisti ang hubo, pasilongi ang walay puy-anan, bisitahi ang masakiton, pamisita sa mga nabilanggo, ilubong ang namatay? Ug idugang usab ang mga Diosnong Buhat sa Kalooy (spiritual works of mercy) sama sa pag-ampo alang sa uban ug sa pakigduyog sa kaguol ug kasakit sa atong kaigsoonan, pagpailub, pagtambag ug pagpanudlo, pagbadlong sa nakasala ug labaw sa tanan, ang pagpasaylo sa imong isigkatawo.

Giablihan ang Holy Door niadtong udto sa Disyembre 13 dinhi sa Arkidayosis sa Dabaw. Nakaagi ka na ba niini?

Hinaut nga diha sa atong pag-agi sa Holy Door, mutoo kita nga ang Amahan malipayon nga mosugat kanatong tanan aron mahimamat ang matag usa kanato.

Dili kini “one-way door”. Diha sa balaang ganghaan moagi pasulod ang tawong makasasala aron mangayo’g pasaylo ug kalooy, ug ang atong Amahan mosugat ug mogakos sa nagbasol nga anak. Karong tuig sa kalooy, adlaw-adlaw Pasko. (Marian Raquel | SFAM SoCCom)