Ang Eyukaristiya, si Maria ug ang mga kabos

Ang tuig 2015 makahuluganon kanatong mga Pilipino Katolika. Doble ang atong kasaulugan: Tuig sa mga kabos ug pangangandam sa umaabot nga ika 51 nga Internasyonal nga Kongreso Eyukaristiya, atong paglaum sa himaya. Apan dinhi sa atong diyosesis, adunay paningkamot nga hiusahon kining duha ka kasaulugan. Busa natahi kining maong hiniusang tema: SI KRISTO DIHA KANATO, PAGLAUM HIMAYA SA KABOS.

Kining atong pamalandong karon mao ang katapusan sa han-ay sa pagtulun-an nga atong misyon ngadto sa mga kabos. Una sa tanan, hisgutan nato ang mahitungod kang maria ug ang Eyukaristiya; ikaduha, si Maria ug ang misyon sa Simbahan alang sa mga nanginahanglan.

Nakadungog na ba kamo niini linyaha: “Dugo sa akong dugo; unod sa akong unod”? Kini ang sagad giingon sa mga ginikanan mahitungod sa ilang mga anak. Nahinumdum mo sa telenovelang “Nathaniel”? Inahan gayud ni Hannah si AVL kay pareho sila sa tipo sa dugo ug positibo usab ang resulta sa DNA. Si Hanna “dugo sa dugo, unod sa unod” ni AVL.

Dili ba miingon si Jesus, atol sa katapusang panihapon: Kini mao ang akong lawas; kini mao ang akong dugo? Gani, siya usab nanudlo: Ang mokaon sa akong unod ug moinom sa akong dugo makabaton sa kinabuhing walay katapusan. Asa gikan kining dugoa? Asa gikan kining unora? Tinuod, ang Dios ang gigikanan sa kinabuhi sa tawo, sa kinabuhi niini. Apan maingon usab nato nga ang pagkatawhanon sa Anak sa Dios diha kang Jesus pakig ambit niya sa pagkatawhanon ni Maria. Si Maria matawag usab nga ginikanan ni Jesus. Busa, ang lawas ug dugo gihatag ni Jesus alang kanato iyang giambitan kang Maria nga iyang inahan. Adunay kalabutan si Maria sa lawas ug dugo ni Jesus nga atong gikalawat diha sa Santos nga Misa kay si Jesus “dugo sa iyang dugo, unod sa iyang unod”. Apan ang Eyukaristiya dili lamang kasaulugan kondili usab kaakuhan; dili lamang pagdawat kang Kristo kondili usab kaugalingon sa usa ka Kristohanon ngadto sa nanginahanglan nga igsoon. Matod pa ni San Juan Crisostomo: ‘…Siya nga miingon, ‘Kini mao ang akong lawas‘ miingon usab, ‘Gigutom ako apan wala nimo ako pakan-a‘, ug ‘ang wala nimo gibuhat sa usa niining ubos nga tawo, wala usab nimo gihimo alang kanako.’ Nan, kat-onan nato ang pagkamangalamon, ug tahuron nato si Kristo sumala sa iayang kabubut-on: pag-apod-apod sa atong mga kabtangan ngadto sa mga kabos…” Kining ang daw nakalimtan nga bahin sa Eyukaristiya sa daghan kanato… apan dili ni Maria.

Hinumduman nato ang Maria nga nagdala sa iyang sabakan sa Anak sa  Dios, “dugo sa iayng dugo: unod sa iyang unod” nagdali sa paglatas sa kabungturan aron lamang makaalagad sa iyang ig-agaw nga si Isabel nga niadto higayona nagsabak bisan sa iyang katigulangon ug nanginahanglan sa pag-abag. Ug sa iyang pagbisita kang Isabel, gisangyaw ug gidayeg ni Maria Dili lamang ang kayo sa Dios kaniya nga ubos ug kabos nga alagad kondili usab ang pag-atiman sa Dios kaniya sa mga mapaubsanon ug mga kabos nga katawhan Hinumduman usab nato si Maria, kang kinsa miambit ang Anak sa Dios sa iyang pagtabang sa magtiayon nga nahutdan ug bino atol sa kombira sa ilang kasal, butang nga nahimong okasyon aron sa unang higayon mapadayag ni Jesus ang matinabangong gahum sa Dios. Si Isabel, ang katawhan nga gitabangan sa Dios, ang magtiayon – sila larawan sa larawan sa mga kabos nga angay nga tabangan: ang mga mag-uuma, mangingisda, mamumuo; nga kababayen-an, mga walay gahum diha sa katilingban; mga gidaugdaug, ug uban pa.

Apan dili usab nato hikalimtan ang mga kabataan ug kabantan-onan. Sila, sa usa ka bahin ang paglaum sa katilingban ug sa Simbahan, apan sa laing bahin ug sa samang higayon gisamok sa kahingawa, pangilad, kasakitan ug kahadlok lakip na sa mga pagsulay nga kabahin sa ilang kahimtang. Sila usab mga kabos nga nanginahanglan sa atong pagtagad ug tabang. Sa pagtubag niining maong hagit, si Maria ang atong panig-ingnan. Siya ang nag-amuma sa batang Jesus ug kabahin sa pagtubo niini sa “kaalam, edad ug grasya atubangan sa Dios ug sa mga tawo”. Siya usab ang gitugyanan sa Ginoo sa batan-on niya tinun-an nga si Juan aron kini atimanon. Ibabaw sa krus, gihimo siya sa Ginoo nga inahan ngadto sa batan-aon: Anak ania ang imong inahan. Busa si Maria ang atong giya sa pag-atiman, pag-amuma, ug paggiya sa mga kabatan-onan nga giisip nga kabahin sa mga kabos tungod sa nahisgutan nilang kasinatian, ang Simbahan naggiya sa mga kabatan-onan ngadto kang Kristo nga mao ang bugtong Dalan, Kamatuoran, ug ang kinabuhi, aron mabuhat nila unsay isugo kanila sa Ginoo.

Dili man kita makaingon nga si Jesus “dugo sa akong dugo, unod sa akong unod.” Usa Lamang ang inahan sa Ginoo nga nagtipig kaniya diha sa iyang sabakan. Apan dili ba gidawat nato siya diha sa Eyukaristiya “lawas ug dugo’? Ato usab siyang gitipigan diha sa atong  kasingkasing sama ni Maria nga iyang inahan. Kon tugutan lamang nato si Kristo nga mobag-o sa atong pagkatawao ug sa atong panglantaw alang sa atong isigkatawo, si Kristo dihakanato mamahimo gayong paglaum sa himaya alang sa kaigsoonang nanginahanglan. Ug kon adunay paglaum bisan sa mga nanginahanglan, nagpasabot kini nga adunay paglaum alang sa tanan.

Pangutana alang sa pagtuon ug pamalandong atol sa pag-inambitay:

• Kon ang pagka-Dios ni Jesus gikan sa Dios nga Amahan, kang kinsa miambit si Jesus sa iyang pagkatawo, lawas ug dugo?
• Unsa ang mga butang nga gihimo ni Maria ngadto sa mga tawo nga nanginahanglan sa iyang tabang?
• Unsay giingon ni San Juan Crisostomo mahitungod sa Eyukaristiya?
• Kumusta na ang imong pagpakiglambigit kang Maria; unsay imong kasinatian niining maong inahan?

Sugyot nga kalihukan:

• Pakaylapon ang debosyon ngadto kang Maria pinaagi sa pag-ampo sa rosaryo sa balay sa mga katilingban dala ang larawan sa mahal nga birhen.
• Mamahimong magdala ug mga gasa alang sa mga tagbalay nga uban sa pag-ampo sa rosaryo.

Dugang nga mga sugyot alang sa konkretong pagpadayag diha sa buhat sa Eyukaristikanhong diwa:

• Ang matag pamilya mopaambit ug pagkaon, bisti, oras, talent alang sa mga kabus, masakiton ug uban pang nanginahanglan ug tabang diha sa katilingban/GKK.
• Maggahin ug Domingo kanus-a ang mga halad nga pagkaon alang sa mga kabus, masakiton, ubp.
• Pag-tigum ug scholarship fund alang sa mga kabus nga estudyante sa katilingban.
• Sutaon kinsa ang mga masakiton sa katilingban ug maggahin ug panahon pagbisita kanila ug tabangan sila sa ialang mga panginahanglang spiritwal o material.
• Dasigon ang mga miyembro sa GKK sa makanunayong pagtambong sa Santos nga Misa o Kasaulogan sa Pulong.
• Ipahigayon ang mapadayunong katekesis sa mga bata, bataan-o ug hamtong bahin sa kristianong pagtoo ug mga sakramento sa matag GKK.
• Dasigon ang mga ginikanan sa aktibong pag-apil sa pormasyon alang sa First Confession, Communion ug Confirmation.
• Manghinlo sa palibot ug mananom ug mga kahoy.