Si Kristo Hari

Si Kristo nga Hari maoy hulagway ni Jesus sa iyang mahimayaong pagbalik sa paghukom sa mga buhi ug sa mga minatay sa katapusang mga adlaw. Lahi kini sa iyang unang pag-anhi nga tinago, hilom, nagpaubos ug kabus. Niining panahona mokunsad siya sa kalibutan nga gamhanan ug mahimayaon. Dili malikayan nga mamatnogonan, ni mataguan ang maong pagbalik Niya.

Kining panahona, panahon sa paghukom ug sa pagluwas. Ang tanang gamhanan, sapian, dungganan niining kalibutan uban sa mga mapaubsanon ug sa mga matinud anong piniling katawhan sa Dios, pagabahinon sa duha ka pundok. Ang pundok sa mga bulahan sa Gingharian sa Dios ug sa mga alaot nga gibulag ug gilabay sa Dios didto sa impiyerno. Diha sa Mt. 25:31-46 masabtan ang sukdanan sa kabulahanan ug kaalaot sa Gingharian sa Dios.

Apan dili kita angay mahadlok sa Kristong Hari tungod kay kon maghukom Siya dili Siya sama sa mga hukom ug mga hari niining kalibutan. Magpatigbabaw gihapon ang iyang kalooy ug duyogkasakit. Magpabilin lang gihapon siya nga Maayong Magbalantay nga magapangita sa mga nawala, aron nga sa makaplagan na Niya sila, iyang luwason sila nga nawala.

Ang mga maunungon ug masaligon Kaniya sa buhi pa sila, wala gayud kahadlok Kaniya. Magpatigbabaw ang ilang gugma ug pagpasalamat sa Diosnong Kalooy nga nasinati gikan Kaniya. Mahinangpon ug malaumon silang nagapaabot sa Iyang pagbalik. Sa kinabuhi ug sa kamatayon, iya sila sa Ginoo, ang Kristong Hari.

Sa laing bahin sila nga kulang sa pagila ug mabaw ang pagtoo sa Dios, puno gayud sa kabalaka ug kahadlok sa Iyang paghari ug paghukom. Apan bisan kining kahadlok ug kabalaka mahimong higayon alang kanila nga mausab ug mobalik sa diosnong kinabuhi. Maoy katuyuan sa mga “katapusang adlaw nga makalilisang. Panahon kini sa pagpahigmata ug pagtawag sa mga masalaypon nga magusab ug mabag-o sa kinabuhi.”

Malipayong Piyesta sa mga Tagum Diocese nga nagsaulog sa ilang kapistahan sa Katedral. Kanimo Mons. Willy Manlapaz ug sa kauban mong kaparian malipayon nga kasaulogan sa Piyesta.