PSL: Maghigugmaay kita!

Sa gipahigayong ika-50 ka kasumaran sa KSP-PSL sa Davao sa USEP gym niadtong Nobyembre 7, si PSl Anacleto Cal gikan sa Our Lady of the Miraculous Medal napili nga mupaambit sa iyang kasinatian.

******

Sugdan nako ang istorya sukad niadtong tuig 1970. Dinhi ko nagsugod ug alagad nga wala ko kahibalo kon unsay pasabot sa “simbahan” o “Pulong sa Ginoo.” Usa ka adlaw, adunay asembleya sa among kapilya ug didto ang among kura-paroko maoy nagpahigayon sa tigom. Pagkahuman sa meeting ang pari midool kanako ug aduna siya’y gipabasa nga rito. Human ug basa, miingon ang pari kanako nga ‘Sukad karon ikaw usa na ka KSP leader.’

Tungod sa akong kakuyaw ug kakulba wala dayon ko makatubag. Apan taud-taod miingon ako, sukad karong adlawa mag-alagad ko sa simbahan hangtod nga may kusog pa. Matuod man, nagpadayon ko pagsilbi sa simbahan, moapil sa misa kada Domingo, sa mga seminars/pormasyon. Gidungagan sa pari ang akong katungdanan nga mao ang pagtabang niya pagpakalawat sa sentro, GKK/kapilya, ug sa masakiton. Malipayon kaayo kong nag-alagad niini bisan pa man nga magbaktas sa alas-kwatro sa kaadlawon sa gilay-on nga pito ka kilometro lugsong-saka sa bukid.

Ug unya, miabot ang panahon nga adunay mga pagsulay kanako. Adunay mga pag-abuso sa santos nga Yukaristiya o ang pagpakalawat panahon sa KSP ug sa masakiton. Sa pagbakasyon sa among kura paroko sa Holland niadtong 1985, gipatawag ug gisukit-sukit ako ni kanhing Msgr. Mabutas. Wala dayon ako katubag sa kahadlok, apan nag-sige siya ug pangutana, busa ako na lang siyang gitubag, ‘Oo, Msgr. Ilang nabuhat.’

Sa tuig 90s, sa bag-o pa ang rito sa Hiniusang Pag-ampo (HP), dili kayo sinati ang lagda niini, busa didto sa among kapilya dunay nahitabo nga panaglalis mahitungod sa kasaulogan. Ug sa maka-usa akong gikasabot ang akong katekista nga mosenyas lang ko niya kung mokanta na, apan wala ko damha nga sa akong pag-senyas kaniya, naa diay ang iyang bana sa pultahan sa kapilya ug dinhi nag-away na hinoon sila. Ako usab sa pag-uli sa balay ang ako usab nga asawa nasuko usab kanako ug nag-away na hinoon kami, matod niya “kamong mga PSL ug katekista maoy kanunay nga mag-uban.”

Ug dinhi mga igsoon daghan pa untang akong kasinatian sa kinabuhi apan kini ra akong ipaambit kaninyo. Manghinaut ako sa tanang mga PSL karon niining pagsaulog nato sa ika-singkwenta ka tuig malipayon unta kita, nga magmabungahon ang pag-apil nga uban sa atong mga kaparian ug mga Obispo nga unta kita makig-sandurot ug makighigugmaay sa usa’g-usa.

******

Salamat Anacleto! Congratulations sa atong mga PSL. Atangi ang uban pang mga kwento sa sunod gula.