Nahiusa kita sa tanang mga Santos

Malipayon nga pagsaulog sa kapistahan natong tanang magtotoo nga mga santos!

Tinuod gayud nga Pista natong tanan kining kasagaran atong naila nga “kalag-kalag.” Kini ang tinuig natong kapistahan sa panaghiusa sa mga santos sa langit, mga santos sa purgatoryo, ug mga santos dinhi pa sa yuta.

Bitaw, niining mga adlawa, gihandum ug gisaulog nato silang tanan nga nagmadaugon na sa kasantos nga nahauna na didto sa langit. Nahilakip niining bagang hut-ong sa mga santos ug martires, ang ginasangpit nato diha sa Litaniya sa mga Santos. Nobiyembre 1 nato sila ginapasidunggan.

Sa Nobiyembre 2, ang mga kaigsoonan natong santos nga nipanaw na ngadto sa laing kinabuhi, apan tungod sa mga pagkulang pa nila, atua pa sila sa gitawag natong purgatoryo diin sila nagahulat nga mahiuban dito sa mga santos sa langit. Maingon nato, nga wala pa makompleto ang ilang panaw sa kalingkawasan ug kaluwasan gikan sa epekto sa ilang mga sala. Nagkinahanglan sila sa panabang sa mga santos sa langit ug sa yuta aron maangkon nila ang kahingpitan sa epekto sa Diosnong kalooy kanila.

Ginapaampoan nato sila, ginapamisahan, ginadagkutan, ug ginaduaw ang ilang mga lubnganan, timaan sa atong paghandum kanila, nga wala nato sila hikalimtii, nga buhi sila sa kanunay sa atong hunahuna ug kasingkasing. Bisan luyo sa mga kakulangan ug pagpasulabi nila uban kanato kaniadto, nagmalipayon ang atong paghandum kanila. Kanunay kitang malaumon nga sa katapusan, ang kadaugan sa Diosnong Kalooy maoy magpatigbabaw.

Kitang mga santos dinhi sa yuta, kita ang nangunay ug nagpahigayon niining kapistahan. Sama sa atong ginaingon diha sa Santos nga Misa, “Hinumdumi Ginoo ang among mga igsoon nga nangamatay na…nagalaum sila sa imong kalooy… Dawata sila sa kahayag sa imong panagway.” Ug magtapos sa pag ingon, “Kaloy-i kaming tanan. Itugot nga kami mahiusa uban ni Maria, ang inahan nga ulay sa Dios, uban kang San Jose iyang bana, ug sa mga Apostoles ug sa tanang mga santos nga nagatuman kanunay sa imong kabubut-on, latas sa katuigan. Uban kanila, amo ikaw nga daygon ug among himayaon, pinaagi ni Kristo imong Anak.”

Busa, dili gayud nato makalimtan, ilabi na sa unang mga adlaw sa Nobiyembre, kung unsay atong ginapaningkamotan — nga masantos kitang tanan. Dili nato hikalimtan ang mga igsoon sa Purgatoryo nga nagapadulong pa ngadto sa kahingpitan sa kaluwasan. Dili usab nato hikalimtan kung asa padulong kining atong panaw sa kalibutan. Dili ang kadaugan ug kalampusan lamang sa yuta ang paningkamotan. Hinonoa, palabwon nato ang pagabot nato, pinaagi sa Diosnong Kalooy, ngadto sa langit, ang tinuod natong puluy-anan.