Mga PSL Gipahinumduman nga Magpabilin sa Mapaubsanong Pag-alagad sa Pulong sa Diyos

“Voca dela Verita!” o ang baba sa Kamatuoran. Mao kini ang paghulagway ni Rev. Fr. Joel Caasi, Director sa Archdiocesan Liturgical Center (ALC) sa mga Pangulo sa Liturhiya (PSL) kinsa nagasaulog sa ika-50 ka tuig nga kasumaran sa pagkamugna sa Kasaulogan sa Pulong (KSP) ug sa PSL.

Isip mga alagad sa Pulong sa Ginoo, gikinahanglan nga magpabilin nga mapaubsanon ang usa ka PSL sanglit siya man ang nahimong baba sa Pulong sa Ginoo. “Dili siya lord over the word, apan servants of the word.” Buot ipasabot, dili niya isipon nga hawod na siya kay plastada na nga makita sa mga tawo, “worse comes to worst, kana bang himoon na niya kining dalan sa pulitika.”

“Dili ingon ana, the more you serve, the more you should become humble,” si Fr. Caasi misumpay.

Siya midugang nga dako kaayo ang papel sa PSL sa pagpahitabo sa kabag-ohan sa Simbahan pinaagi sa gitawag nga “intensification of the propagation of the Word of God.”

“Nag-ugat kini sa Vatican Council II,” si Fr. Caasi nagkanayon, “If you remember 1962-1965…nga usa sa gitagaan didto ug duot mao ang gitawag nga renewal of the Church.”

Tungod niini gitagaan ug gimbug-aton mao ang papel sa layko. “Kuyaw kaayo sa Pilipinas ilabi na sa Dabaw kay iya gyud nga gipahitabo kini pinaagi sa impluwensya sa mga misyonaryong pari sa PME,” si Fr. Caasi misumpay. “It was a breakthrough, I would say…nga wala sa ubang nasud.”

Sanglit ang matag 25 ka tuig usa man ka gitawag nga Jubilee sa Simbahan, panahon sa kagawasan ug pagpasaylo, mao kini ang higayon sa renewal, “sama sa yuta, kinahanglan nga mopahulay (sa tanom), mao kini ang higayon sa pagpamalandong aron ma re-energize ka; ang tema nato nagpahinumdom nga we are not just counting the years but the life within those years.”

Atol sa culminating activity karong Nob. 7 sa USEP Gymnasium, hatagan ug pasidungog ang mga indibiduwal nga mga PSL kinsa nakahatag ug maayong panig-ingnan sa iyang pagserbisyo, sa ilang talento ug bahandi.

Pasidunggan usab ang mga nakaserbisyo gikan 15, ngadto sa 20 ug 50 ka tuig nga mga PSL hasta na ang mga PSL nga nahimong pari, “sama nila Fr. Max Bahinting, Fr. Toto España, Fr. Henry Campeon, ug Fr. George Angga.” Pasalamatan usab ang mga nangaging mga PSL Coordinators sa Arkidayosis ug ALC Directors.

Sa laing bahin, sa paglantaw sa unahan, abli si Fr. Caasi sa posibilidad nga modawat na ug mga PSL nga babae sama sa altar servers nga nag-alagad karon sa pipila na ka mga simbahan sa Dabaw. “In fact the document of the Church naghisgot g’yud ana, nga servers, irregardless of sexes,” matud ni Fr. Caasi.

Dugang pa, gipanghinaut usab nga ang matag usa mamahimong usa ka PSL, “the deeper sense of understanding of the Liturgy of the Word nga ang matag pamilya maghinuklog mahitungod sa Pulong sa Ginoo pinaagi sa preparatory reflection nga himoon matag pamilya una motambong sa Misa.”

Alang sa mga batan-on, gilantaw ni Fr. Caasi nga mas epektibo nga approach kanila mao ang paghulagway kon illustrative way of reading the Word, “gamit ang modernong teknolohiya.”

Apan taliwala niining moderno nga kalibutan, si Fr. Caasi nagkanayon, “go back to the basics, go back to the Word of God. At the end, we will realize that life is just simple. Sa kinaulahian, wala na kitay laing saligan gawas sa Ginoo.”

Sa katapusan, gipaabot ni Fr. Caasi sa tanang mga PSL: “Continue serving. In the ultimate analysis we are not just here to serve the church but follow the will of God. Kay ang atong gihandom mao man ang gingharian sa Ginoo, mao nga padayon lang g’yud ta.”