‘Luyo sa dag-um, dunay kahayag’

33rd Sunday in Ordinary Time
Mk. 13:24-32

Ang ebanghelyo nga gibasa kabahin kini sa tibuok Kapitulo 13 sa ebanghelyo ni Markos ug kauban niini (Mt 24:1-44; Lk 21:5-36) nga nagpadayag mahitungod sa ikaduhang pag abot sa Anak Sa Tawo (1 Thes 4:13-18), o gitawag usab kini og katapusan sa panahon o katapusan sa kalibutan. Ang mga senaryo nga teribling kagun-uban, sama sa kangitngit sa mga adlaw ug bulan, ang pagkahanaw sa mga bituon sa mga kalangitan, ug uban pa, nagpakita og dakung kabalaka ug kahadlok sa tawo.

Apan ang gipunting ni Hesus dili mao ang teribleng kagun-uban nga mahitabo kon dili and bag-ong kinabuhi nga magsugod human sa kagun-uban. Iya kining gilarawan sa usa ka kahoy’ng igera (fig tree) nga panahon sa tingtugnaw (winter time) mangalaya ug mangahulog ang mga dahon ug ang punu-an niini sama’g patay’ng tan-awon. Apan pagkahuman sa tingtugnaw, dunay bag-ong kinabuhi, mugitib ang bag-ong udlot, mahimong dahon kini, mulipang ug mamunga’g daghang mga bunga. Sa Daang Tugon, ang kahoy’ng igera nga mangudlot ug mamunga usa ka imahen sa nagsingabot nga mga panalangin sa Dios nga madawat sa tawo (Joel 2:22).

Sa tanang mga kahoy sa Palestina, ang kahoy’ng igera nagsimbolo pag-ayo sa kausaban gikan sa pagkatulog ngadto sa pagmata ug paglambo niini; usa ka agi-anan gikan sa kamatayon ngadto sa kinabuhi. Sa laing pagkasulti, ang pag-abot sa gingharian sa Dios naglatid sa dalan gikan sa kasakitan ngadto sa kahimayaan. Unsa man kini alang sa tawo? Ang ebanghelyo nagpahinumdum nga sa mga panahon sa kaguliyang, ang tawo maningkamot sa pagpangita’g kahupayan diha sa mga timaan sa paglaum nga gipakita sa Dios pinaagi sa nature, sama pananglitan sa ulan nga nangahulog sa nag-ugang yuta; sama sa usa ka tanum nga bag-ong mitubo; ug mga bag-ong dahon nga migitib diha sa nag-ugang sanga. Ang tawo nga matuuhon sa Dios dili kinahanglang mabalaka ug mahadlok sa mga panghitabo sa iyang kinabuhi ug palibot tungod kay dunay gina-ingon nga “luyo sa dag-um dunay kahayag” ug “luyo sa pagsakripisyo dunay kalampusan.” Busa gihagit ang tawo sa pagkinabuhi nga matinud-anon nga uyon sa kabubut-on sa Dios. MABUHAY ANG KAGAWASAN! (Fr. Arnulfo Cubero)