Frat member kaniadto, pari na karon

Si Reb. Padre Dino C. Ariola, SVD nag ingon, “You are not called to be perfect, but to be faithful.” Kini ang iyang gipamuy-an nga pulong sulod sa tulo ka dekada.

Natawo sa Lapaz, Iloilo niadtong Septembre 17, 1946, siya ikaunom sa 13 ka managsuon. Wala siya nidako sa Iloilo tungod kay nibalhin sila sa Mabolo, Cebu.

Ang mga panahon nga siya nag uban sa iyang ate sa pagtambong sa Santos nga Misa ang nakapadasig kaniya nga mahimong altar server. Mao pud kini ang nakapalambo sa iyahang pagtoo sa Ginoo.

Makunsidera ni Padre Dino nga dili sila arangan, apan luyo sa pagpaningkamot sa iyahang amahan nga mamahimo siyang doktor sa usa ka dakong unibersidad sa Manila, nakalampos gayud siya sa ikaduhang ang-ang sa proper medicine. Apan sa pagkamatay niini (amahan), mipauli siya sa Cebu.

Sa iyang kabatan-on, nagpa miyembro kini sa usa ka fraternity. Ug bisan wala na ang iyang amahan, nakaeskwela gihapon siya sa University of San Carlos, Cebu nga gidumala sa Societas Verbi Divini o SVD. Dunay mga higayon nga mga seminarista sa SVD ang iyang nakumbinse nga muapil sa iyang frat. Gikan niining kasinatian ug iyang pag-uban uban nila, nabuhi pag-usab ang iyang gusto nga musulod sa seminaryo aron mamahimong pari. Busa ming apply siya ug nadawat sa SVD niadtong tuig 1974.

Giporma siya uban sa 100 ka mga novitiates. Ginganlan nila ug Verbum Incanatum ang ilang klase ug kinse silang naordinahan isip pari niadtong Oktobre 25, 1980.

Sa Togo, Africa ang kinaunhang mission assignment ni Fr. Ariola. Nagtuon una siya ug French sa Belgium sa usa ka tuig una kini miadto sa mission station.

Human sa tulo ka tuig, nibakasyon siya sa Pilipinas. Sa dihang nanginahanglan ug school chaplain ang Divine Word University (Liceo Verbo Divino) sa Tacloban, Leyte, siya mao ang gipadala.

Miadto usab siya sa Roma aron sa pagtuon sa Spiritual Formation Course. Kini nagamit niya sa iyang uban pang assignments: School Chaplain sulod sa 5 ka tuig sa Divine Word College (Holy Name University), Tagbiliran, Bohol; Kura paroko sulod sa 5 ka tuig sa Socoro, Siargao Island ug sa Sabang, Surigao City; School Chaplain sulod sa 2 ka tuig sa University of Southern Philippines; ug Spiritual Director sa mga nangandoy nga mamahimong Brothers sa SVD sa St. Joseph Friendametz Formation Center-Cebu.

Sa pagkakaron, siya ang Spiritual Director sa Divine Word Formation Center-Davao nga nahimutang sa Skyline Road, Catalunan Grande, niining syudad sa Dabaw. Iyang gisaulog ang ika-34 nga anibersaryo isip ordinadong paring relihiyoso niadtong Oktobre 25.