Ayaw pagpatuyang

Unang Domingo sa Adbiyento
Jer. 33:14-16/Sal. 25/1 Thes. 3:12-4:2/Lk. 21:25-28, 34-36

Makalilisang ang nahitabo sa nasud sa Francia. Gatusan ka mga inosenteng tawo ang namatay sa terorismo. Makahadlok ang nahitabong Yolanda sa Leyte duha na katuig ang milabay. Dunay mga linog ug baha karon atong nasinati. Hapit na ba kaha moabot ang Manluluwas?

Gisugdan nato karong Dominggoha ang panahon sa Adbiyento, panahon sa pagpaabot. Nangandam na usab kita sa paghandum sa pagkatawo ni Hesukristo ug naghulat sa Iyang pagbalik. Giingon sa unang pagbasa, moabot na ang adlaw sa katumanan sa gisaad sa Dios, ang adlaw sa katarong ug kaluwasan.

Unsa kaha ang atong batasan sa pagpaabot? Ayaw pagpatuyang. Mao kini ang espiritu sa pagpaabot nato sa hingpit nga kaluwasan. Dili kita angayan nga magsobra sa kalibutanon nga pangandoy ug kalihukan. Dili kita angay nga magpalabi sa katagbawan nga materyal ug taphaw lamang katagbawan. Dili usab kita angay nga mabalaka. Taliwala sa mga moabot nga katalagman, magmabinantayon lamang kita kay moabot gayod ang mga katalagman nga timaan sa pagbalik sa Manunubos.

Dakung temtasyon sa panahon sa kakuyaw ug kalisud ang pagkawala sa direksiyon ug kahulugan sa kinabuhi. Ang uban maniguro na lamang sa kaugalingon ug magpasagad bisan unsay dangatan aron lamang matagbaw taliwala sa kasigpit sa panahon. Apan dakung hagit ang pag-atiman sa atong kaugalingon isip gasa sa Dios. Dakung hagit ang pagbalik kaniya human nato giusikan ang panahon, ang kinaiyahan, ug ang daghan pang mga gasa nga gihatag Niya kanato. Dakung hagit ang pagpamalandong kanunay ug pag-ampo alang sa giya sa matag lakang nato. Sukwahi sa kabutbot-on sa Ginoo ang pagpatuyang nga wala na lama’y paghuna-huna sa kabililhon sa kinabuhi ug pagtuo nga atong nadawat.

Paningkamutan ta unta nga masentro nato ang atong kaugalingon sa tinuoray nga diwa sa pagpaabot. Motubo unta ang atong gugma sa usa’g usa. Magmalig-on unta ang atong kasing-kasing ug molambo ang atong kabalaan. Mahimuot unta ang Dios diha sa atong mga maayong buhat ug sa pagsunod sa Iyang gitudlo kanato. Sa Dios ibayaw ta ang atong kalag. Huptan ta ang pagpugong sa kaugalingon ug likayan ta ang pagpatuyang aron maandam kita sa pag-abot sa Manunubos.